…तरी मला शांततेचा नोबेल मिळणार नाही! ट्रम्प अखेर मनातलं बोलले; पाकिस्तानने पाठवला प्रस्ताव.

अमेरिकेचे राष्ट्राध्यक्ष डोनाल्ड ट्रम्प यांनी अखेर शांततेच्या नोबेल पुरस्काराबाबत आपल्या मनातलं बोलून दाखवलं आहे. नोबेल पुरस्कारासाठी आपण कितीही प्रयत्न केले तरी ते आपल्याला मिळणार नाही असे ट्रम्प म्हणाले आहेत. विशेष म्हणजे, पाकिस्तानने यंदाच्या शांततेच्या नोबेलसाठी डोनाल्ड ट्रम्प यांच्या नावाचा प्रस्ताव पाठवला आहे. अमेरिकेचे राष्ट्राध्यक्ष डोनाल्ड ट्रम्प यांनी सोशल मीडियावर नुकतीच एक पोस्ट टाकली आहे. यात त्यांनी जगभरात शांततेसाठी अनेक कामे केल्याचा दावा केला. पंतप्रधान नरेंद्र मोदी आणि भारत सरकारने अमेरिकेचे दावे वेळोवेळी फेटाळून लावले. तरीही आपणच भारत आणि पाकिस्तान युद्ध थांबवले असा पुनरुच्चार त्यांनी आपल्या पोस्टमध्ये केला.अमेरिकेचे राष्ट्राध्यक्ष डोनाल्ड ट्रम्प यांनी शांततेच्या नोबेल पुरस्काराबाबत वक्तव्य केलं आहे. पाकिस्तानने त्यांचे नाव प्रस्तावित केले असले तरी, पुरस्कार मिळण्याची शक्यता कमी असल्याचे ते मानतात. त्यांनी भारत-पाकिस्तानमधील युद्ध थांबवण्यासह अनेक जागतिक शांतता प्रयत्नांमध्ये योगदान दिल्याचे सांगितले.

शांततेचा नोबेल पुरस्कार आपल्याला मिळावा अशी तीव्र इच्छा ट्रम्प यांनी सोशल मीडियावर व्यक्त केली आहे. पण, तरीही लोकांचे प्रेम आपल्यासाठी पुरे असल्याचे ते पुढे म्हणाले.ट्रम्प यांनी लिहिल्याप्रमाणे, “मी काहीही केलं तरीही मला शांततेचा नोबेल पुरस्कार मिळणार नाही. कांगो आणि रवांडा यांच्यात शांतता प्रस्थापित केली. भारत आणि पाकिस्तानचे युद्ध थांबवले. सर्बिया आणि कोसोवोमध्ये शांतता प्रस्थापित केली. इजिप्त आणि इथिओपियामधील संघर्ष टाळला.”एवढेच नव्हे तर “अब्राहम करार घडवून आणला. या करारात आणखी देश सहभागी होतील. मध्य पूर्व देशांना एकत्र आणण्याचा प्रयत्न आहे. सध्या जगात दोन सर्वात मोठे संघर्ष सुरू आहेत. रशिया आणि युक्रेन किंवा इस्रायल आणि इराण युद्धात हस्तक्षेप करून तो प्रश्न सोडवला तरीही मला नोबेल मिळणार नाही.” असे ट्रम्प यांनी सांगितले आहे.एकाचवेळी पुरस्कार मिळणार नाही असे बोलताना ट्रम्प यांनी स्वतःच्या कामांचा पाढा वाचला. तसेच आपण किती महान कार्य केले हे सांगण्याचा प्रयत्न केला. ते पुढे बोलताना म्हणाले. “मी काय केले हे लोकांना माहित आहे. तेच माझ्यासाठी महत्त्वाचे आहे. नोबेल पुरस्काराबद्दल चर्चा सुरू असतानाच ट्रम्प यांनी हे विधान केले आहे.नोबेल पुरस्कार मिळणार नाही याची खंत आहेच, परंतु आपण काय केले आणि काय केले नाही याची जाणीव जनतेला आहे. त्यामुळे, पुरस्कार मिळो की नाही मिळो आपल्याला फार काही फरक पडत नाही असेही ते म्हणाले. विशेष म्हणजे, आपल्या नोबेल पुरस्काराचा दावा मजबूत करण्यासाठी ट्रम्प यांनी चक्क पाकिस्तानचे लष्करप्रमुख सैय्यद असीम मुनीर अहमद शाह यांना जेवणाला बोलावले होते. त्यानंतर पाकिस्तानने ट्रम्प यांच्या नावाचा प्रस्ताव नोबेल समितीकडे पाठवला आहे.