मर्सिडीजची धडक, नवी मुंबईत विवाहितेचा मृत्यू, 19 वर्षीय इंजिनिअरिंग विद्यार्थिनी ताब्यात.

बुधवारी सायंकाळी 7 वाजता गोपाल यादव आणि रेखा हे दोघे पती-पत्नी स्कूटरवरुन नवीन पनवेल येथे परत येत असताना अपघात झाला.मुंबईहून पनवेलच्या दिशेने भरधाव वेगाने जात असलेल्या मर्सिडीज बेंझ कारने पुढे जाणाऱ्या स्कूटरला धडक दिली. या अपघातात स्कूटरवरील महिलेचा मृत्यू ओढवला, तर स्कूटर चालवणारा तिचा पती गंभीर जखमी झाला. ही घटना बुधवारी रात्री नवी मुंबईतील शीव-पनवेल मार्गावर खारघर परिसरातील हिरानंदानी ब्रिजजवळ घडली.
खारघर पोलिसांनी या अपघाताला जबाबदार असलेल्या 19 वर्षीय मर्सिडीज कार चालक तरुणीला ताब्यात घेतले आहे. तिथी सिंग असे तिचे नाव असून ती नवीन पनवेल भागातील रहिवासी आहे. ती इंजिनिअरिंगची विद्यार्थिनी असल्याची प्राथमिक माहिती समोर आली आहे.

या अपघातातील मरण पावलेल्या महिलेचे नाव रेखा यादव, वय 42 वर्ष, असे आहे. तर जखमी झालेल्या तिच्या पतीचे नाव गोपाल यादव, वय 54 वर्ष, असे आहे. यादव दाम्पत्य नवीन पनवेलमधील देवद भागात कुटुंबीयांसह राहण्यास आहेत. रेखा यादव या घाटकोपर पंत नगर येथील एका खासगी रुग्णालयात रिसेप्शनिस्ट म्हणून काम करत होत्या.बुधवारी सायंकाळी 7 वाजता गोपाल यादव आणि रेखा हे दोघे पती-पत्नी स्कूटरवरुन नवीन पनवेल येथे परत येत होते. रात्री 8 वाजण्याच्या सुमारास त्यांची स्कूटर शीव-पनवेल मार्गावरील खारघर येथील हिरानंदनी पूल उतरुन पुढे जात होती.

याचवेळी पाठीमागून भरधाव वेगाने येणाऱ्या मर्सिडीज बेंझ कारने त्यांच्या स्कूटरला धडक दिली. त्यामुळे स्कूटरवरील यादव दाम्पत्य खाली पडले.इतर वाहन चालकांनी जखमी गोपाल व त्यांची पत्नी रेखा या दोघांना बाहेर काढून गंभीर जखमी अवस्थेत कामोठे येथील एमजीएम रुग्णालयामध्ये दाखल केले. मात्र तेथील डॉक्टरांनी रेखा यांना मृत घोषित केले. या घटनेने यादव कुटुंबावर दुःखाचा डोंगर कोसळला आहे.या अपघाताला जबाबदार असलेली मर्सिडीज कार चालवणारी 19 वर्षीय इंजिनिअरिंगची विद्यार्थिनी तीर्था सिंह हिला खारघर पोलिसांनी ताब्यात घेतले आहे.