महाराष्ट्राच्या शिक्षण विभागाचा ‘रात्रीचा खेळ’ सुरूच! निर्णय येतो थेट अकरा वाजता; नेमकं प्रकरण काय?

त्यामुळे शिक्षण विभाग हा रात्री निर्णय घेण्याचा नवा पायंडा पाडत आहे का, असा प्रश्न उपस्थित होत आहे.राज्यात पहिलीपासून तिसरी भाषा लागू होईल आणि हिंदी ही सर्वसाधारण तिसरी भाषा असेल, याबाबतचे शुद्धीपत्रक शिक्षण विभागाने मंगळ. रात्री ११ वा. नंतर जाहीर केले. यावर शिक्षण विभागाच्या उपसचिवांनी रात्री १० वाजून ३४ मिनिटांनी सही केल्याचेही स्पष्ट दिसते. त्यानंतर, या शुद्धीपत्रकाआधारे राज्य शैक्षणिक संशोधन व प्रशिक्षण परिषदेने (एससीईआरटी) नवीन अभ्यासक्रमानुसार, पहिली आणि दुसरीसाठी विषय योजना, शालेय कामाचे दिवस, वेळापत्रक आदींबाबतचे परिपत्रक जाहीर केले. यावर एससीईआरटीच्या संचालकांनी रात्री ११.३० वा. सही केल्याचे दिसते.हे दोन्ही निर्णय शिक्षणक्षेत्राच्या दृष्टीने घातक होते. त्यामुळे विभागाने धक्कातंत्राचा वापर केला असावा, असे राज्य मुख्याध्यापक महासंघाचे माजी उपाध्यक्ष महेंद्र गणपुले यांनी म्हटले. एवढे मोठे निर्णय शिक्षणक्षेत्राशी संबंधित घटकांशी चर्चा करून घेणे अपेक्षित असते. विभागाने याला बगल दिली, असे राज्य अभ्यासक्रम आराखड्याच्या सुकाणू समितीच्या सदस्याने गोपनीयतेच्या अटीवर सांगितले.’सध्या शिक्षणक्षेत्रात गडबडीचा काळ आहे, अनेक कार्यालये रात्री उशिरापर्यंत काम करत आहेत. वेळापत्रकाबाबतच्या परिपत्रकावर बुधवारी उशिरा सही झाली, तरी प्रत्यक्ष ते गुरुवारी दुपारी प्रसिद्ध झाले. रात्री निर्णयाचा पायंडा वगैरे काही नाही. शैक्षणिक वर्ष सुरू झाल्यामुळे ते तातडीने जाहीर केले,’ असे एससीईआरटीचे संचालक राहुल रेखावार म्हणाले.