साताऱ्यात मुसळधार; अतिवृष्टीमुळे महाबळेश्वर – तापोळा रस्ता खचला, वाहतूक विस्कळीत.

साताऱ्यात मुसळधार पाऊस सुरू आहे. पावसाच्या संततधारमुळे अनेक धरणातील पाणी पातळीत वाढ झाली आहे. दरम्यान, अतिवृष्टीमुळे महाबळेश्वर – तापोळा रस्ता खचल्याची घटना घडली आहे.

महाबळेश्वर – तापोळा रस्ता मध्यरात्रीच्या अतिवृष्टीमुळे चिखली शेडजवळ मोठ्या प्रमाणावर दरड कोसळल्यामुळे खचला आहे.रस्ता खचल्यामुळे वाहतूक विस्कळीत झाली असून रस्ता बंद ठेवण्यात आला आहे. तातडीने जिल्हा आपत्ती व्यवस्थापनने दुरुस्तीचे काम हाती घेतलं आहे.घाट रस्त्यांवर दरडी कोसळले आहेत. डोंगरावरील मातीचा भराव निसटू लागल्याच्या घटना घडू लागल्या आहेत. त्यामुळे भूस्लखनाच धोका वाढू लागला आहे.गेल्या २४ तासांत जिल्ह्यात कोयना १३३, नवजा १५८, महाबळेश्वर १५३ मिलिमीटर पाऊस झाला आहे.जिल्ह्यात पश्चिमेकडे मान्सून पावसाने जोर पकडला आहे. सातारा, वाई, जावली, पाटण, कराड तालुक्यात दमदार पावसाने हजेरी लावली.मुसळधार पावसाने दरड कोसण्याची भीती आहे. दरम्यान, जावळी खोऱ्यात तर पावसाची संततधार सुरू असून, कण्हेर, वेण्णा लेक, महू धरणात पाण्याची आवक वाढली आहे.हवामान खात्याने सातारा जिल्ह्यात 19 जून रोजी ऑरेंज, तर 20 आणि 21 जून रोजी यलो अलर्ट दिला आहे.