मराठवाड्यात सर्वदूर मुसळधार पाऊस, वादळी पावसाने केळी बागांचे नुकसान; वीज कोसळून चौघांचा मृत्यू.

मराठवाड्यात गेल्या २४ तासांत सरासरी ४९.९ मिमी पाऊस झाला आहे. जोरदार पावसामुळे नांदेड जिल्ह्यातील केळी बागांचे मोठे नुकसान झाले आहे. हवामान विभागाने पुढील काही दिवस वादळी पावसाचा अंदाज वर्तवला आहे.मराठवाड्यात गेल्या २४ तासांत सरासरी ४९.९ मिलिमीटर पावसाची नोंद झाली आहे. धाराशिव, नांदेड आणि लातूर जिल्ह्यात सर्वाधिक पाऊस झाला आहे. ठिकठिकणी वीज अंगावर पडून चौघांचा मृत्यू झाला.सिल्लोड तालुक्यातील सारोळा येथे यश राजू काकडे (वय १४) आणि रोहित राजू काकडे (वय २१) या भावंडांचा मृत्यू झाला. मोढा येथे शेतात अंगावर वीज पडल्याने रंजना बापूराव शिंदे (वय ५०) यांचा मृत्यू झाला. पिंपळदरी येथे शिवाजी सतीश गव्हाणे यांचा मृत्यू झाला, तर त्यांचे भाऊ जीवन सतीश गव्हाणे गंभीर जखमी झाले आहेत.

 कन्नड तालुक्यात तिघे जखमी झाले असून, एक बैलाचा मृत्यू झाला आहे.मराठवाड्यात तीन दिवसांपासून जोरदार पाऊस सुरू आहे. गेल्या २४ तासांत म्हणजेच शनिवारी सकाळी साडेआठपर्यंत धाराशिव जिल्ह्यात सर्वाधिक ७३.६ मिमी पाऊस झाला आहे. नांदेड ६१.२, लातूर ६१.१, जालना ४५.६, हिंगोली ४४.३, छत्रपती संभाजीनगर ४१.१, बीड ३८.७ आणि परभणी ३७.७ अशी जिल्हानिहाय पावसाची नोंद झाली आहे. नांदेड जिल्ह्यातील अर्धापूर तालुक्यात वादळी पावसामुळे केळीच्या बागांचे मोठे नुकसान झाले आहे. या शेतीची आमदार श्रीजया चव्हाण आणि बहुजन कल्याणमंत्री अतुल सावे यांनी शनिवारी पाहणी केली. पेरणीसाठी हा पाऊस फायदेशीर ठरला आहे.विभागात पावसाला सुरुवात झाल्यानंतर धरणात पाण्याचा ओघ सुरू झाला आहे.

जायकवाडी धरणात २९.७६ टक्के पाणीसाठा झाला आहे. निम्न दुधना ३६.८८, येलदरी ५०, सिद्धेश्वर १९.५३, माजलगाव ११.७९, मांजरा २६.७२, पेनगंगा ४३.१२, मानार ४८.७४, निम्न तेरणा ७०.१८, विष्णुपुरी २३.६८ आणि सीना कोळेगाव २९.७७ असा धरणनिहाय पाणीसाठा उपलब्ध आहे, अशी माहिती जलसंपदा विभागाने दिली आहे.भारतीय हवामानशास्त्र विभागाच्या अंदाजानुसार आज, रविवारी वादळासह पावसाची शक्यता आहे. येत्या २० जूनपर्यंत मध्यम ते हलका पाऊस पडणार आहे, असा अंदाज आहे.