कोल्हापूरवरून पुण्यात उतरल्या, रिक्षा पकडताना नाल्यात वाहिल्या…दोन दिवसांनी वारजेला सापडली बॉडी, महिलेसोबत काय घडलं?

पुण्यात नवले पूल परिसरात रस्ता ओलांडताना एक महिला नाल्यात पडून वाहून गेली. अग्निशमन दलाने दिवसभर शोध घेतल्यानंतर सायंकाळी तिचा मृतदेह वारजेजवळ नदीत सापडला. वडगाव बुद्रुक येथील नवले पूल परिसरात एक महिला रस्ता ओलांडताना नाल्यात पडली आणि वाहून गेली. पावसामुळे पाण्याचा प्रवाह जास्त असल्याने हा प्रकार घडला.

ही घटना गुरुवारी रात्री ११ ते १२ दरम्यान घडली. अग्निशमन दलाच्या जवानांनी घटनास्थळी धाव घेऊन बचाव कार्य सुरू केले. दिवसभराच्या शोधकार्यानंतर शुक्रवारी सायंकाळी सातच्या सुमारास महिलेचा मृतदेह वारजे स्मशानभूमीजवळ नदीपात्रात आढळून आला. शोभा मनोहर महिमाने (वय ५७, रा. दर्शन पार्क, फुरसुंगी, मूळ रा. बार्शी) असे मृत महिलेचे नाव आहे.शोभा या कोल्हापूरवरून पुण्यात आल्या. त्या वेळी नवले पुलाजवळ उतरून फुरसुंगी जाण्यासाठी रिक्षा पकडण्याचा प्रयत्न करीत होत्या. पावसामुळे साचलेल्या पाण्याचा अंदाज न आल्याने त्या रस्त्याच्या कडेला असलेल्या नाल्यात पडल्या. तेथे उपस्थित कारचालकासह तिघांनी त्यांना वाचविण्याचा प्रयत्न केला. मात्र, पाण्याचा प्रवाह अधिक असल्याने त्या क्षणातच वाहून गेल्या.अग्निशमन दलाच्या कात्रज, सनसिटी, नवले पूल या तिन्ही विभागाच्या जवानांकडून शोध कार्य सुरू करण्यात आले. शुक्रवारी सायंकाळी पाच वाजेपर्यंत शोध घेण्याचे काम सुरू होते. दरम्यान वडगाव पुलाजवळ या महिलेची पादत्राणे आणि साडी आढळली. अखेर सायंकाळी मुठा नदीपात्रात महिलेचा मृतदेह सापडला.