आम्ही महादेवाचं दर्शन घेऊन येतो! जोशी कुटुंबातील ३ भावंड घराबाहेर पडली, पण नंतर घडलं अघटित.

 जालना जिल्ह्यातील वरुडमध्ये देवदर्शनाला गेलेल्या तीन मुलांचा दुर्दैवी मृत्यू झाला. यश जोशी, रोहन जोशी आणि दिपाली जोशी अशी त्यांची नावे आहेत. हे तिघे एकाच कुटुंबातील होते. महादेव मंदिरात दर्शनासाठी जात असल्याचे त्यांनी घरी सांगितले. मुले परत न आल्याने कुटुंबीयांनी शोध घेतला.जालना: जालना जिल्ह्यातील वरुड येथे देवदर्शनासाठी गेलेल्या तीन मुलांचा दुर्दैवी मृत्यू झाला आहे. ही मुले सोमवार सकाळपासून बेपत्ता होती. त्यांचा शोध सुरू असताना, गावातील एका शेततळ्यात त्यांचे मृतदेह आढळले. यश जोशी (वय १४), रोहन जोशी (वय ७) आणि दिपाली जोशी (वय ९) अशी त्यांची नावे आहेत. हे तिघेही एकाच कुटुंबातील होते.काल सकाळी ही मुले महादेव मंदिरात दर्शनासाठी जात असल्याचे सांगून घरातून निघाली होती. “आम्ही महादेव मंदिरात दर्शनासाठी चाललो आहोत,” असे त्यांनी घरच्यांना सांगितले. मात्र, रात्र झाली तरी ते परत न आल्याने कुटुंबीयांनी त्यांचा शोध सुरू केला. परंतु, शेततळ्यात त्यांचे मृतदेह सापडले.

सोमवार हा महादेवाचा वार असल्याने जोशी कुटुंबातील ही मुले देवदर्शनासाठी जायची तयारी करत होती. घरातले लोक त्यांच्या कामात व्यस्त होते. त्यामुळे, मुले घरातून कधी निघाली हे त्यांना समजले नाही. जेव्हा मुले बराच वेळ घरी परतली नाहीत, तेव्हा कुटुंबीयांनी त्यांना शोधायला सुरुवात केली. त्यांनी आजूबाजूचा परिसर पिंजून काढला. पण मुले कुठेच सापडली नाहीत. त्यानंतर कुटुंबीयांनी पोलिसांची मदत घेतली. त्यांनी पोलिसांना सर्व घटनाक्रम सांगितला आणि मुलांचे फोटो दाखवले. पोलिसांनीही मुलांचा शोध सुरू केला. त्यांचे फोटो विविध ग्रुपवर पाठवले. रात्रभर मुलांचा शोध चालू होता. शेवटी, काही लोकांनी माहिती दिली की, काही मुले शेततळ्यात तरंगत आहेत.कुटुंबीयांनी तातडीने घटनास्थळाकडे धाव घेतली. तिथे त्यांना त्यांची मुले मृतावस्थेत आढळली. हे पाहून मुलांच्या आई-वडिलांनी एकच टाहो फोडला. या घटनेमुळे संपूर्ण परिसरात शोककळा पसरली आहे.दरम्यान, ही मुले तलावात कशी गेली, हा प्रश्न अनेकांना पडला आहे. पोलिस या प्रकरणाचा अधिक तपास करत आहेत. मुलांच्या मृत्यूचे नेमके कारण काय आहे, हे शोधण्याचा प्रयत्न करत आहेत. या दुर्दैवी घटनेमुळे वरुड आणि आसपासच्या परिसरात दु:खाचे वातावरण आहे.