जॉईनिंगची तारीख बदलली अन् होत्याचं नव्हतं, विक्रोळीत गुलमोहराचं झाड पडून 26 वर्षीय तरुणाचा मृत्यू.

 नव्या नोकरीचा पहिला दिवस असल्याने सोमवारी तेजस रात्रपाळीला जाणार होता. मात्र, त्या कंपनीच्या ‘एचआर’ विभागातून दूरध्वनी आला आणि तो पहिला दिवस बुधवार, 28 मे रोजीचा ठरलागुलमोहरचे मोठे झाड अचानक उन्मळून अंगावर कोसळल्याने विक्रोळी कन्नमवार नगर येथील पॅराडाईस टॉवर या संक्रमण शिबिरातील इमारतीत राहणाऱ्या तेजस नायडू या 26 वर्षीय तरुणाचा सोमवारी रात्री आठ वाजताच्या सुमारास मृत्यू झाला. त्याच्यासोबतचे दोन मित्र या घटनेत किरकोळ जखमी झाले आहेत. त्यांनीच त्याला तातडीने रुग्णालयात नेले. मात्र, रुग्णालयात दाखल करून घेण्यापूर्वी डॉक्टरांनी त्याला मृत घोषित केले. या हृदयद्रावक घटनेने कन्नमवार नगर जनता मार्केट परिसरात शोककळा पसरली आहे.

नव्या नोकरीचा पहिला दिवस असल्याने सोमवारी तेजस रात्रपाळीला जाणार होता. मात्र, त्या कंपनीच्या ‘एचआर’ विभागातून दूरध्वनी आला आणि तो पहिला दिवस बुधवार, 28 मे रोजीचा ठरला. त्यामुळे रात्री 8 वाजताच्या सुमारास मित्रांसोबत निवांत गप्पा मारण्यासाठी गणेश मैदानात गेलेल्या तेजसवर अचानक काळाचा घाला आला आणि त्याचा अंत झाला. ठरल्याप्रमाणे पहिल्या रात्रपाळीच्या ड्युटीवर जावे लागले असते तर कदाचित तेजसचा प्राण वाचला असता…‘तेजसने काही दिवसांपूर्वी आधीची नोकरी सोडली होती आणि नव्या कंपनीत त्याची निवड झाली होती. त्याप्रमाणे 26 मे हाच त्याचा नव्या कंपनीतील नोकरीचा पहिला दिवस होता. रात्रपाळी होती. पण त्याच दिवशी त्याला कंपनीच्या एचआर विभागातून दूरध्वनी आला आणि पहिला दिवस 28 मे रोजीचा ठरला असल्याचे त्याला सांगण्यात आले. म्हणून तो मित्रांसोबत गप्पा मारण्यासाठी जनता मार्केट येथील गणेश मैदानात गेला होता. पण अचानक हे घडले आणि आम्ही तेजसला गमावले’, असे तेजसची बहीण नम्रता नायडू हिने ‘मटा’ला सांगितले.दरम्यान, ‘कन्नमवार नगर परिसरात अनेक मोठमोठी झाडे आहेत. अनेक वृक्ष हे रस्त्यांलगत व इमारतींच्या संरक्षक भिंतींलगत आहेत. या सर्व झाडांची योग्य ती पाहणी करून वरच्या फांद्या छाटणे आवश्यक आहे. याविषयी महापालिकेला पत्रही लिहिले आहे. पूर्वीही स्थानिकांनी पत्र लिहिले होते. तेजसच्या मृत्यूच्या घटनेनंतरही पत्र लिहिले आहे. महापालिका याची वेळीच दखल घेईल, अशी अपेक्षा आहे’, असे पॅराडाईस टॉवर सोसायटीतील रहिवासी राजेश सावंत यांनी सांगितले.