सॉरी मम्मी, पप्पा, बायको… काविळीने लेकीचा बळी घेतला, शिक्षक पित्याने चिठ्ठी लिहिली, पायाला दगड बांधून आयुष्य संपवलं.

वर्षभरापूर्वी शिक्षकाच्या अवघ्या 14 वर्षीय मुलीचा काविळीच्या आजाराने मृत्यू झाला होता. लाडक्या लेकीचा मृत्यू झाल्याने पित्याला विरह सहन होत नव्हता.’माझी मुलगी सोनल हिच्या आठवणीत मी हे पाऊल उचलत आहे, कुणालाही दोषी धरु नये; मम्मी, पप्पा, बायको, गुड्डी, संध्या, आर्या आय एम व्हेरी सॉरी’ अशा आशयाचा मजकूर लिहून शिक्षकाने आत्महत्या केल्याची धक्कादायक घटना छत्रपती संभाजीनगर येथे उघडकीस आली आहे. वर्षभरापूर्वी शिक्षकाच्या अवघ्या 14 वर्षीय मुलीचा काविळीच्या आजाराने मृत्यू झाला होता. लाडक्या लेकीचा मृत्यू झाल्याने पित्याला विरह सहन होत नव्हता. अखेर 47 वर्षीय शिक्षक पित्याने स्वतःच्या पायाला दगड बांधून विहिरीत उडी घेऊन आत्महत्या केली. ही घटना मंगळवार दिनांक 20 मे रोजी करमाड येथे उघडकीस आली. या घटनेमुळे गावात हळहळ व्यक्त केली जात आली.

सुनील मिट्टू तारो, वय 47 वर्ष, रा. करमाड असे आत्महत्या करणाऱ्या शिक्षकाचे नाव आहे. सुनील तारो हे करमाळा येथील न्यू हायस्कूल शाळेमध्ये संगणक शिक्षक म्हणून कार्यरत होते. सुनील तारो हे करमाड येथे आई, वडील, पत्नी, एक मुलगी यांच्यासह राहत होते.सुनील यांच्या सोनल नावाच्या 14 वर्षीय मुलीला गेल्या वर्षी काविळीची लागण झाली होती. तिच्यावर छत्रपती संभाजीनगर शहरातील रुग्णालयात उपचार सुरु होते, मात्र उपचार सुरू असताना 21 जून 2024 रोजी सोनलची प्राणज्योत मालवली. लाडक्या लेकीचा मृत्यू झाल्यामुळे सुनील तारो हे तणावात होते.सोनल न्यू हायस्कूल शाळेमध्ये आठवीच्या वर्गात शिकत होती.

तिला अभिनय, सूत्रसंचालन करण्याची प्रचंड आवड होती. शाळेतील प्रत्येक कार्यक्रमात ती उत्साहाने सहभागी होत असे. सोशल मीडियावर देखील तिचे अनेक सामाजिक विषयांवर जनजागृती करण्याचे व्हिडिओ आहेत.दरम्यान. मंगळवार दिनांक 20 मे रोजी सुनील तारो हे फिरायला गेले होते. यावेळी त्यांनी गावातील नागरिकांना कॉल करून आत्महत्या करणार असल्याची माहिती दिली. त्यानंतर काही वेळातच पायाला भला मोठा दगड बांधून त्यांनी विहिरीत उडी घेतली.दगडामुळे काही क्षणात ते तळाला गेले. नागरिकांनी त्यांना तात्काळ बाहेर काढून रुग्णालयात दाखल केले असता डॉक्टरांनी तपासून मृत घोषित केले. या घटनेमुळे गावकऱ्यांनी हळहळ व्यक्त केली.