‘शक्तीपीठ महामार्ग हा लोकसभा निवडणुकीसाठी फंड जमा करण्याचा कार्यक्रम’, रविकांत तुपकरांचा गंभीर आरोप.

क्रांतिकारी शेतकरी संघटनेचे अध्यक्ष रविकांत तुपकर यांनी शक्तीपीठ महामार्गावरुन लोकप्रतिनिधींवर निशाणा साधला. “शक्तीपीठ महामार्ग हा केवळ लोकसभा निवडणुकीसाठी फंड जमा करण्याचा कार्यक्रम आहे”, अशी खोचक टीका रविकांत तुपकर यांनी केली.”नागपूर ते गोवा जाणारा शक्तिपीठ महामार्ग हा व्हावा म्हणून त्या परिसरातील कोणत्याही शेतकऱ्यांनी मागणी केली नाही. तरीदखील सरकार शक्तिपीठ महामार्ग करत आहे. शक्तिपीठ महामार्ग हा सर्वसामान्य आणि शेतकऱ्यांसाठी नसून येणाऱ्या 2029 च्या लोकसभा निवडणुकीसाठी फंड जमा करण्याचा कार्यक्रम आहे. शक्तीपीठ जिथून सुरू होईल आणि जिथे संपेल त्या भागातील आमदार मालामाल होतील. त्यांच्या अंगात पैशाची शक्ती येईल. सर्व कमिशन खाऊन बसतील. सर्व पक्षांना फंड मिळेल”, अशी खोचक टीका क्रांतिकारी शेतकरी संघटनेचे अध्यक्ष रविकांत तुपकर यांनी केली आहे. रविकांत तुपकर आज परभणी जिल्हा दौऱ्यावर आले होते. यावेळी त्यांनी पत्रकारांना संबोधन केले. “राज्य सरकारने काही वर्षांपूर्वी समृद्धी महामार्ग केला त्यामध्ये देखील नागपूरपासून मुंबईपर्यंत अनेकांची समृद्धी झाली. ज्यांची खायची सोय नव्हती ते आता फॉर्च्यूनरमध्ये फिरत आहेत.

त्यामुळे हे महामार्ग मान्य म्हणजे फंड उभारण्याचा एक कार्यक्रम आहे. याचा शेतकरी आणि सर्वसामान्यांना कसलाही फायदा नाही”, असं रविकांत तुपकर म्हणाले.”महाराष्ट्रातला शेतकरी आज एकटा पडलेला आहे. या गावगाड्यातल्या शेतकऱ्याला आधार देण्यासाठी, आणि मनाच्या दारात टिकलेल्या या शेतकऱ्याला लढायला शिकवण्यासाठी क्रांतिकारी शेतकरी संघटनेच्या माध्यमातून मी महाराष्ट्रभर दौरा करत आहे. राज्यात शेतकऱ्यांच्या दररोज दहा आत्महत्या होत आहेत. सरकार आकडेवारी सभागृहात मांडत आहे. पण त्यावर कसल्याही प्रकारचा ठोस निर्णय घेत नाही. निवडणुकीच्या काळात शेतकऱ्यांचा सातबारा कोरा करू म्हणणाऱ्या याच सत्ताधाऱ्यांनी आता कर्जमाफी वरून शब्द फिरवला आहे”, अशी टीका रविकांत तुपकर यांनी केली.”येणाऱ्या काळात मोठे आंदोलन करून सरकारला शेतकऱ्यांची कर्जमाफी करायला आम्ही भाग पाडणार असल्याचेही रविकांत तुपकर म्हणाले.

सरकारने शेतकऱ्यांना फाट्यावर बांधण्याचे काम करण्याचा प्रयत्न केला तर आम्ही सरकारच्या मंत्र्यांना रस्त्यावर देखील फिरू देणार नाही”, असा इशारा रविकांत तुपकर यांनी दिला.”शेतकरी चळवळीच्या माध्यमातून काही नेते आपले राजकारण सेफ करण्याचा प्रयत्न करत आहेत. स्वतःचा मतदारसंघ स्वतःची आमदारकी सेफ करण्याचा प्रयत्न करत आहेत. तुमच्या मतदारसंघात तुम्ही आंदोलन जोरात करतात आणि दुसरीकडे मात्र तेच आंदोलन सौम्य करतात. कोल्हापूर, सांगली या जिल्ह्यात ऊसाला चांगला दर मिळतो. तर मराठवाड्यातील ऊसाला चांगला दर का मिळत नाही? आम्ही कोणाच्याच वर्किंगला जाऊन बसलो नाहीत. अनेक नेते विविध पक्षांच्या वळसे जाऊन बसले. पण रविकांत तुपकर याने लाल दिवा एका क्षणात सोडून गावाकडे निघून आला”, असे म्हणत रविकांत तुपकर यांनी माजी खासदार राजू शेट्टी यांच्यावर सडकून टीका केली