विजय शहांपाठोपाठ राम गोपाल यादवही बरळले; लष्करी अधिकाऱ्यांचा जातीवरुन उल्लेख.

मध्य प्रदेशातील भाजपचे मंत्री विजय शहा यांनी कर्नल सोफिया कुरेशी यांच्यावर केलेल्या टीकेच्या संदर्भाने बोलताना समाजवादी पक्षाचे खासदार राम गोपाल यादव यांनी वरील विधान केले. ‘विंग कमांडर व्योमिका सिंह आणि एअर मार्शल ए. के. भारती हे कोण आहेत, हे जर या लोकांना माहिती असते, तर त्यांनी त्यांना शिवीगाळ केली असती,’ असे विधान समाजवादी पक्षाचे ज्येष्ठ नेते आणि राज्यसभेचे खासदार राम गोपाल यादव यांनी केले. त्यावर चहुबाजूंनी टीका होताच, यादव यांनी ‘माझे विधान न ऐकताच टीका केली जात आहे,’ असे म्हटले. उत्तर भारतात त्यातही विशेषत: उत्तर प्रदेशात अल्पसंख्याक, दलित आणि मागासवर्गीयांवर होत असलेल्या अत्याचारांच्या घटनांचे संदर्भ त्यांनी दिले.मध्य प्रदेशातील भाजपचे मंत्री विजय शहा यांनी कर्नल सोफिया कुरेशी यांच्यावर केलेल्या टीकेच्या संदर्भाने बोलताना समाजवादी पक्षाचे खासदार राम गोपाल यादव यांनी वरील विधान केले. यादव यांच्या विधानावर उत्तर प्रदेशचे मुख्यमंत्री योगी आदित्यनाथ यांनीदेखील टीका केली होती. समाजवादी पक्षाचे खासदार रामगोपाल यादव यांनी विंग कमांडर व्योमिका सिंह यांच्यावर टीका केल्यानंतर उत्तर प्रदेशचे मुख्यमंत्री योगी आदित्यनाथ यांनी त्यांच्यावर टीकास्त्र सोडले आहे. ‘एक्स’वर पोस्ट करून टीका करताना आदित्यनाथ म्हणाले, की लष्कराच्या गणवेशाला कोणीही जातीय चष्म्यातून पाहू नये.

लष्कराचा प्रत्येक जवान हा राष्ट्रीय कर्तव्य बजावत असून, तो कोणत्याही जातीचे अथवा धर्माचे प्रतिनिधित्व करत नाही, असे आदित्यनाथ म्हणाले. दरम्यान, उत्तर प्रदेशचे मंत्री बेबी राणी मौर्य यांनीही यादव यांच्या विधानाचा समाचार घेतला.यादव यांच्या विधानावर बहुजन समाज पक्षाच्या नेत्या मायावती यांनीही टीका केली आहे. लष्करात जाती आणि धर्माच्या आधारावर भेद करणे चुकीचे असल्याचे मायावती या वेळी म्हणाल्या.योगी यांच्या टीकाला उत्तर देताना यादव म्हणाले, की मुख्यमंत्री आदित्यनाथ यांनी माझे विधान न ऐकता त्याला जातीयवादी ठरवून टाकले. मुख्यमंत्र्यांच्या नाकाखाली राज्यात दररोज अनेक अत्याचाराच्या घटना घडत आहेत, असेही यादव म्हणाले. या वेळी त्यांनी माध्यमांवरही टीका केली. भाजप वगळता माध्यामांवर कोणीही विश्वास ठेवत नसल्याचे यादव म्हणाले.मध्य प्रदेशचे मंत्री विजय शहा यांच्या पाठोपाठ याच राज्याचे उपमुख्यमंत्री जगदीश देवडा यांच्या विधानानेही नवा वाद उफाळला आहे.

‘संपूर्ण देश, देशाची सैन्य दले व सैनिक हे पंतप्रधान नरेंद्र मोदी यांच्या पायाशी नतमस्तक आहेत,’ असे विधान देवडा यांनी केले. जबलपूरमधील नागरी संरक्षण स्वयंसेवकांच्या प्रशिक्षण कार्यक्रमात उपमुख्यमंत्री देवडा यांनी ‘यशस्वी पंतप्रधान नरेंद्र मोदी यांना आम्ही धन्यवाद देतो. संपूर्ण देश, देशाची सैन्य दले आणि सैनिकही मोदींच्या पायाशी नतमस्तक आहेत. मोदींनी जे प्रत्युत्तर दिले, त्याचे करावे तेवढे कौतुक कमी आहे,’ असे विधान केले. ‘देशाची सैन्य दले व जवानांना पंतप्रधानांच्या पायाशी नतमस्तक करणारी देवडा यांची भाषा अत्यंत हीन व अवमानास्पद आहे. हा सैन्य दले व सैनिकांच्या शौर्य व पराक्रमाचा अपमान आहे. भाजपची मानसिकताच निम्न स्तराची आहे,’ अशी टीका काँग्रेसने केली आहे.