लाडकी बहीण योजनेबद्दल अजित पवारांचे मोठे विधान, म्हणाले, आता लाडक्या बहिणींना आम्ही कर्ज देणार

बारामती तालुक्यातील मुढाळे येथे उपमुख्यमंत्री अजित पवार यांच्या हस्ते 33/11 के व्ही. विद्युत उपकेंद्राचे भूमिपूजन झाले. लाडक्या बहिणींना पैसे दिल्याने ग्रामीण अर्थव्यवस्था सुधारली, त्यांना कर्जही मिळणार आहे, असे पवार म्हणाले. आठ लाख शेतकऱ्यांना सौर ऊर्जा पंप देण्यासाठी 24000 कोटींची तरतूद आहे. लवकरच राज्यातील वीज बिल कमी होणार आहे.उपमुख्यमंत्री अजित पवार यांच्या हस्ते बारामती तालुक्यातील मुढाळे येथे 33 /11 के व्ही. विद्युत उपकेंद्र भूमिपूजन पार पडले आहे. यावेळी अजित पवार यांनी अनेक गोष्टींवर भाष्य केले. लाडकी बहीण योजनेबद्दल बोलताना अजित पवार म्हणाले की, लाडक्या बहिणींना आम्ही पैसे देत असल्यामुळे ग्रामीण भागातील अर्थव्यवस्था बळकट झाली आहे. आता लाडक्या बहिणींना आम्ही कर्ज देखील देणार आहोत. राज्य सरकारने विधानसभा निवडणुकीच्या दरम्यान लाडकी बहीण योजना सुरू केली होती.

अजित पवार पवार म्हणाले की, आठ लाख आठ हजार शेतकऱ्यांना सौर ऊर्जा पंप आम्ही देत आहोत. यासाठी 24000 कोटी रुपयांची तरतूद केली आहे. एक लाख तीस हजार घरांकरिता 500 मेगावॉट क्षमतेच्या सौर ऊर्जा संच आम्ही बसवलेले आहेत. येणाऱ्या काही काळात राज्यातील ग्राहकांचे 70 टक्के वीज बिल टप्प्याटप्प्याने कमी होणार आहे. टेक्निकल लोकांनी आम्हाला सांगितले की, हे शून्यावर येणार आहे पण मला ते ऐकून भीतीच वाटते ते शून्यावर नाही आले म्हणजे लोक म्हणतात थापा मारतोय.शेतकऱ्यांचा आणि लोकांचा आपण फायदा करून देत आहोत. अजित पवार पुढे म्हणाले, मी परवा महिंद्रा कंपनीची इलेक्ट्रिक 32 लाखांची गाडी घेतली. कंपनीने 500 किलोमीटरचा दावा केला आहे पण साडेतीनशे किलोमीटर तर ती एकदा चार्ज केल्यावर चालते. मुंबईवरून यायचं इथं आपलं फुकट बारामतीमध्ये पोहोचायचं.

महाराष्ट्रातील प्रत्येक पेट्रोल पंपावर आम्ही आता चार्जिंग स्टेशन करत आहोत त्याशिवाय गत्यंतर नाहीये. काळानुरूप आपल्याला बदलावी लागेल.ग्रामीण भागाच्या विकासावर आम्ही लक्ष केंद्रित केले आहे तसं नियोजन सुरू आहे. महायुतीचं सरकार पुढील काळात सर्व जाती धर्म प्रांत भाषा नागरिकांनासोबत घेऊन विकासाच्या वाटेवर चालत राहण्याचे आमचे ध्येय आहे. महापुरुषांचा आदर्श डोळ्यासमोर आम्ही ठेवत आहोत, तुमच्या सर्वांची साथ मला आठ निवडणुकीत मिळाली आहे या वेळेस देखील तुम्ही मला लाखाच्या फरकाने निवडून दिले त्याबद्दल आपल्याला धन्यवाद.आता जबाबदारी तुमची कामे पाच वर्ष चोख पद्धतीने करणे तुमच्या भागाचा विकास करणे रोजगार निर्माण करणे, शिक्षणाची नवीन दालने उघडणे सुविधा देणे या सर्व गोष्टी माझ्याकडून सातत्याने चालतात. बारामतीमध्ये मुळीक आणि यादव हे दोन पर्सनल असिस्टंट ठेवले आहेत त्यांच्याशी संपर्क साधा ते मला मुंबईला सर्व काही कळवतील. पुढे आपल्याला जिल्हा परिषद पंचायत समितीच्या निमित्ताने पुढे यायचं आहे, असेही अजित पवार यांनी म्हटले.