आईला अखेरचा फोन, मग ओमची बॉडी सापडली, घड्याळ-मोबाईल फोडलेले; ITIच्या विद्यार्थ्यासोबत काय घडलं.

बुलढाण्यात एका आय़टीचं शिक्षण घेणाऱ्या विद्यार्थ्याचा मृतदेह रेल्वे रुळावर आढळून आल्याने एकच खळबळ उडाली आहे. या विद्यार्थ्याने स्वत:चा जीव घेतला की त्याची कोणी हत्या केली, याचा तपास सध्या सुरु आहे.विद्यार्थ्यांना शिक्षण घेत असताना ताण-तणाव आणि आपल्या घरापासून इतरत्र दुसऱ्या गावी जाऊन स्पर्धेत टिकावं लागत असतं. या तणावातून नेमकं ते काय पावलं उचलतात याकडे देखील लक्ष ठेवणे आवश्यक असते. अन्यथा एखादी मोठी घटना घडू शकते. तसंच, बुलढाणा येथे घडलं आहे.बुलढाणा जिल्ह्यातील खामगाव शहरातील जलंब रेल्वे मार्गावर 19 वर्षीय विद्यार्थी ओम विठ्ठल गिरे याचा मृतदेह आढळून आला आहे. या घटनेने परिसरात एकच खळबळ उडाली आहे. ही घटना 15 मे रोजी गुरुवारी सकाळी उघडकीस आली आणि त्यानंतर प्राथमिक तपासात पोलिसांनी आकस्मिक मृत्यूची नोंद केली आहे.

ओम विठ्ठल गिरे हा खामगाव येथील आयटीआय संस्थेत फिटर ट्रेडचे शिक्षण घेत होता. मूळगाव देऊळगावमही तालुका मेहकर येथील रहिवासी असलेला ओम खामगावच्या अमृत नगर परिसरात भाड्याच्या खोलीत राहत होता. घटनेच्या एक दिवस आधी त्याने आपल्या कुटुंबीयांशी फोनवरुन संवाद साधला होता. मात्र, दुसऱ्या दिवशीच त्याचा मृतदेह रेल्वे रुळावर आढळून आल्याने एकच खळबळ माजली आहे.घटनास्थळी पोलिसांनी धाव घेतली असता मृतदेहाजवळ ओमचे घड्याळ आणि मोबाईल दोन्हीही दगडाने फोडून टाकण्यात आल्याचे आढळले. त्यामुळे नातेवाईकांनी या घटनेवर आक्रमक पवित्रा घेत हत्या झाल्याचा संशय व्यक्त केला आहे.

त्याने आपल्या आयुष्याची अखेर केली नसून त्याला कोणीतरी मारलं आहे, असा आरोप नातेवाईकांनी केला आहे. पोलिसांनी मात्र सध्या आकस्मिक मृत्यू म्हणून नोंद केली असून घटनेचा अधिक तपास सुरू असल्याचे सांगितले आहे. ओमचा मृत्यू घातपात आहे की त्याने स्वत:चा जीव दिला आहे, याचा पोलीस कसून तपास करत आहे. दरम्यान, खामगाव परिसरात या घटनेनंतर भीतीचे वातावरण असून नागरिकांनी विद्यार्थ्यांच्या सुरक्षिततेबाबत प्रश्न उपस्थित केले आहेत.ओमच्या अचानक जाण्याने कुटुंबीय शोकसागरात बुडाले आहेत. तर, मित्र परिवारातूनही हळहळ व्यक्त होत आहे. या प्रकरणात काय सत्य बाहेर येते याकडे लक्ष लागले आहे. एकंदरी पोलीस याप्रकरणाचा तपास करत असून आता या प्रकरणातले सत्य काय बाहेर येते, हे तपासानंतर स्पष्ट होईल.खामगाव रेल्वे पोलिसांनी याबाबतची माहिती शेगाव लोहमार्ग पोलिसांना दिली. माहिती मिळताच पोलिसांनी घटनास्थळ गाठून पंचनामा केला. याप्रकरणी लोहमार्गाचे पोलीस हेड कॉन्स्टेबल विजय कोल्हे यांनी दिलेल्या तक्रारीवरून शेगाव रेल्वे पोलिसांनी मर्ग दाखल केला आहे.