कुख्यात गजा मारणेला पोलीस मोठा दणका देणार; आयुक्तांनी थेट ‘कुंडली’च काढली!

पुण्यातील गुंड गजा मारणे पोलिसांसोबत मटण पार्टी केल्याने पुन्हा वादात सापडला आहे. येरवडा कारागृहातून सांगलीला नेताना त्याने हे कृत्य केले. पोलीस आयुक्तांनी तातडीने कारवाई करत काही कर्मचाऱ्यांचे निलंबन केले आहे. तसेच, त्याच्यावरील एका जुन्या गुन्ह्यात आरोपपत्र दाखल होणार आहे.पुणे: पोलिसांसोबत केलेल्या मटण पार्टीमुळे पुण्यातील कुख्यात गजानन ऊर्फ गजा मारणे पुन्हा चर्चेत आला आहे. गजा मारणेला येरवडा कारागृहातून सांगली कारागृहात नेताना पोलिसांसमोरच मारणे याने आपल्या समर्थकांसोबत मटण पार्टी केल्याचं उघड झालं. हा प्रकार समोर येताच संतापलेले पोलीस आय़ुक्त अमितेश कुमार यांनी एका सहायक निरीक्षकासह चार पोलीस कर्मचाऱ्यांचं निलंबन केलं. तसंच आता गजा मारणे याला दणका देत एका जुन्या गुन्ह्यात लवकरच आरोपपत्र दाखल करण्यात येणार असल्याचंही पोलीस आयुक्तांनी स्पष्ट केलं आहे.

गजा मारणे याच्याविरोधात वारजे माळवाडी पोलिसांकडून २०२१मध्ये दाखल झालेल्या एका गुन्ह्यात लवकरच आरोपपत्र दाखल करण्यात येणार असल्याची माहिती पोलीस आयुक्त अमितेश कुमार यांनी दिली आहे. फेब्रुवारी २०२१मध्ये तळोजा कारागृहातून सुटल्यानंतर मोठ्या जल्लोषात मारणेने मिरवणूक काढून शक्तिप्रदर्शन केले होते. त्यावेळी वारजे माळवाडी पोलीस ठाण्यात त्याच्यावर गुन्हा दाखल करण्यात आला होता. या गुन्ह्यातील आरोपपत्र आता दाखल केले जाणार आहे.

१५ फेब्रुवारी २०२१ रोजी पुणे-बंगळुरू महामार्गावरील चांदणी चौकात झालेल्या घटनेप्रकरणी गजा मारणे व त्याच्या साथीदारांनी जमावबंदी आदेशाचे उल्लंघन करत कोव्हिड-१९च्या काळात मास्क न घालता व सामाजिक अंतर न राखता मिरवणूक काढली होती. पोलिसांनी त्यांना थांबवण्याचा प्रयत्न केला. त्या वेळी मारणे आणि समर्थकांनी सरकारी कामात अडथळा आणला होता. या प्रकरणात पोलिसांनी आरोपपत्रातून मारणेचे नाव वगळले होते.दरम्यान, पोलीस आयुक्तांनी जुन्या गुन्ह्यांच्या घेतलेल्या आढाव्यात ही बाब समोर आल्यानंतर तपास पुन्हा सुरू करण्यात आला आहे. त्यामुळे या गुन्ह्यात पुरवणी आरोपपत्र दाखल करण्यात येणार आहे. त्यात मारणेचे नाव समाविष्ट केले जाणार आहे.मकोका अंतर्गत कारवाई करण्यात आलेला गुंड गजा मारणेला येरवडा कारागृहातून सांगली कारागृहात घेऊन जाताना पोलिसांसमक्ष एका ढाब्यावर मारणे आणि त्याच्या साथीदारांची ‘मटण पार्टी’ झाल्याचा धक्कादायक प्रकार समोर आला. कोथरूडमधील एका तरुणाला मारहाण केल्याप्रकरणी मारणेसह अन्य काही जणांवर गुन्हा दाखल करण्यात आला आहे. या प्रकरणात मारणे टोळीवर ‘मकोका’ लावण्यात आला आहे. ते सर्व आरोपी सध्या येरवडा कारागृहात आहेत. मात्र, पुणे पोलिसांनी एक महिन्यापूर्वी मारणे याला सांगली कारागृहात स्थलांतरित करण्याचा निर्णय घेतला होता. त्यानुसार गुन्हे शाखेचे एक पथक त्याला बंदोबस्तात सांगलीला घेऊन चालले होते. त्या वेळी मटण पार्टीचा धक्कादायक प्रकार घडला.