जुन्या मुंबई-पुणे हायवेवर कंटेनरने चिरडलं, वाढदिवसाच्या आदल्या रात्री कर्तव्यदक्ष पोलिसाचा करुण अंत.

 14 मे रोजी मिथुन धेंडे यांचा वाढदिवस होता, मात्र त्याच्या आदल्याच दिवशी काळाने त्यांच्यावर घाला घातला.जुन्या मुंबई-पुणे महामार्गावर कंटेनरने चिरडल्यामुळे पोलीस हवालदाराचा मृत्यू झाल्याची दुर्दैवी घटना समोर आली आहे. पुणे जिल्ह्यात कार्ला फाटा येथे मुंबईकडून चाकणच्या दिशेने जाणाऱ्या एका कंटेनर चालकाने वडगाव मावळ पोलीस ठाण्याच्या पोलीस हवालदाराला चिरडले. मिथुन धेंडे, वय 38 वर्षे, असे मयत पोलिसाचे नाव आहे.मंगळवारी रात्री साधारण 9 वाजून 40 मिनिटांच्या सुमारास कंटेनरने पोलीस हवालदाराला चिरडल्याची घटना समोर आली आहे. या घटनेने परिसरात हळहळ व्यक्त होत आहे. विशेष म्हणजे 14 मे रोजी मिथुन धेंडे यांचा वाढदिवस होता, मात्र त्याच्या आदल्याच दिवशी काळाने त्यांच्यावर घाला घातला.

या घटनेमुळे धेंडे कुटुंबीय शोकसागरात बुडाले असून नातेवाई, मित्र परिवार आणि पोलिस दलावर शोककळा पसरली आहे.याबाबत पोलिसांनी दिलेल्या माहितीनुसार, मुंबईकडून चाकणच्या दिशेने जाणारा एक कंटेनर कार्ला फाटा येथून अत्यंत वेगाने येत होता. याचा व्हिडिओ एका तरुणाने काढून पोलिसांना कळवला. पुणे ग्रामीण कंट्रोल रूमने कंटेनर थांबवण्याचे आदेश दिले. त्यानुसार, मिथुन धेंडे हे वाहतूक नियमन करत असताना कंटेनर चालकाने भरधाव वेगाने त्यांना धडक दिली. या धडकेत धेंडे यांचा जागीच मृत्यू झाला. अपघातानंतर चालक कंटेनरसह चाकणच्या दिशेने पळून गेला.वडगाव मावळ पोलिसांनी या प्रकरणी गुन्हा दाखल करून चालकाचा शोध सुरू केला आहे. सीसीटीव्ही फुटेज आणि प्रत्यक्षदर्शींच्या जबाबाच्या आधारे तपास सुरू आहे. धेंडे यांच्या पश्चात पत्नी, दोन मुले आणि वृद्ध आई-वडील असा परिवार आहे. त्यांच्या निधनाने पोलिस दलात आणि गावात शोक व्यक्त केला जात आहे.पोलिसांनी संबंधित कंटनेर चालकाच्या विरुद्ध कठोर कारवाई करणार असल्याचे आश्वासन दिले आहे. या प्रकारणी अधिक तपास पोलिसांकडून केला जात आहे. मात्र या घटनेने पुण्यात एकच खळबळ उडाली आहे.