बीड बदलतंय! नवनीत काँवत अॅक्शन मोडमध्ये, मकोकानंतर आणखी चार बदमाश गुंडांची जेलमध्ये रवानगी.

 बीड जिल्ह्यात पोलीस अधीक्षक नवनीत काँवत यांनी अवैध धंदे आणि गुन्हेगारीवर कडक कारवाई सुरू केली आहे. वाल्मिक कराडच्या गुंडांवर मकोका लावल्यानंतर, आता तारेख खान, विशाल डांबे, गजानन जाधव आणि गणेश गिरी या चार कुख्यात गुंडांना हर्सूल कारागृहात पाठवण्यात आले आहे. गंभीर गुन्हे दाखल असलेल्या या गुंडांवर प्रतिबंधात्मक कारवाई करण्यात आली असून, जिल्ह्यात गुन्हेगारी मोडून काढण्याचा निर्धार पोलिसांनी केला आहे.बीड जिल्ह्यातून मोठी बातमी समोर आली आहे. बीडमध्ये सरपंच संतोष देशमुख यांची हत्या झाल्यानंतत पोलिसांच्या बदल्या करण्यात आल्या होत्या. बीड जिल्ह्याची सूत्र एसपी म्हणून नवनीन काँवत यांच्याकडे दिली गेली होतीत. बीडमध्ये पाऊल ठेवताच जिल्ह्यातील अवैध धंदे आणि गुन्हेगारीला आळा बसवण्यासाठी त्यांनी कारवाई सुरू केली आहे. रविवारी ११ मे बीडमधील वाल्मिक कराडच्या काही गुडांवर मकोका दाखल केला होता. अशातच गुंडगिरी करणाऱ्यांना त्यांनी थेट जेलची हवा खायला पाठवलं आहे.

बीड जिल्ह्यातील गुंडगिरी, गुन्हेगारी आणि अवैध धंद्यांना आळा बसावा, यासाठी जिल्हाधिकारी विवेक जॉन्सन आणि पोलीस अधीक्षक नवनीत काँवत यांनी कठोर कारवाई केली आहे. त्याअंतर्गत बीड जिल्ह्यातील चार कुख्यात गुंडांना एकाच दिवशी हर्सूल कारागृहात पाठवण्यात आले. या कारवाईमध्ये तारेख खान (रा. माजलगाव), विशाल डांबे (रा. वडवणी), गजानन जाधव (रा. अंबाजोगाई) आणि गणेश गिरी (रा. बीड) या गुंडांवर विविध गंभीर गुन्ह्यांमध्ये कारवाई करण्यात आली.तारेख खान याच्यावर जीव घेण्याचा प्रयत्न, मारहाण, चोरी आणि इतर गंभीर गुन्हे नोंद असून त्याला यापूर्वी तडीपार करण्यात आले होते. विशाल डांबे याच्यावर छेडछाड, जबरी चोरी व पॉस्को अंतर्गत गुन्हे आहेत. गजानन जाधव याच्यावर हातभट्टी दारूची वाहतूक आणि विक्रीचे गुन्हे आहेत. तर गणेश गिरी याच्यावर खंडणी, जाळपोळ, जातीय भावना भडकवणे असे गंभीर गुन्हे नोंद आहेत.या सर्व गुंडांवर त्यांनी आधी केलेल्या गुन्ह्याच्या आधारे प्रतिबंधात्मक कारवाया करण्यात आल्या असून, आता त्यांना हर्सूल कारागृहात रवानगी करण्यात आली आहे. संबंधित पोलीस ठाण्यांनी ही कामगिरी पोलीस अधीक्षकांचे मार्गदर्शन घेत नियोजनपूर्वक केली. पोलीस अधीक्षक नवनीत कावत यांनी स्पष्ट केलं की, जिल्ह्यात गुन्हेगारी, खंडणी, अवैध दारू विक्री, वाळू तस्करी, काळाबाजार, तसेच जातीय तेढ निर्माण करणाऱ्या समाजकंटकांवर भविष्यातही मकोका आणि इतर कठोर कायद्यांतर्गत कारवाई केली जाणार आहे.