शेर की झलक सबसे अलग! CSKची ताकद वाढली, जवळपास 300 स्ट्राईक रेटने डेब्यू मॅचमध्येच गोलंदाजांवर तुटून पडला, पाहा कोण.

कोलकातामध्ये आयपीएलचा रोमांचक सामना झाला. चेन्नई सुपर किंग्जने कोलकाता नाईट रायडर्सला हरवले. युवा खेळाडूने सीएसकेसाठी पदार्पण केले. त्याने तुफानी फलंदाजी करत सर्वांना आकर्षित केले. अवघ्या 11 चेंडूत 31 धावा केल्या. यात चार षटकारांचा समावेश होता. या खेळीमुळे सीएसकेच्या मधल्या फळीला एक चांगला फलंदाज मिळाला आहे.आयपीएल 2025 मधील 57 वा सामना कोलकाता नाईट रायडर्स आणि चेन्नई सुपर किंग्जमध्ये पार पडला. या सामन्यामध्ये शेवटच्या ओव्हरपर्यंत कोण बाजी मारणार काही समजत नव्हतं. मात्र कॅप्टन धोनीने षटकार मारत सामना सीएसकेच्या पारड्यात झुकवला. या सामन्यामध्ये सीएसकेकडून एका युवा खेळाडूने झकास पदार्पण केले. या मोसमामध्ये त्याच्या फलंदाजीकडे सर्वांचे लक्ष लागलेले होते. पठ्ठ्या मैदानात उतरल्यावर वातावरण तयार केलं होतं. चार षटकार मारत या खेळाडूने सर्वांचं लक्ष वेधलं. कोण आहे तो खेळाडू जाणून घ्या.हा खेळाडू दुसरा तिसरा कोणी नसून उर्विल पटेल आहे. या खेळाडूची वेगळी ओळख करून देण्याची गरज नाही. टी-२० फॉरमॅटमध्ये उर्विलने सर्वात वेगवान शतक ठोकले होते.

नोव्हेंबर 2024 मध्ये उर्विल पटेलने सैयद मुश्ताक अली ट्रॉफीमध्ये त्रिपुरा विरुद्ध 28 चेंडूत शतक ठोकले. टी20 क्रिकेटमध्ये सर्वात जलद शतक मारणारा तो भारतीय खेळाडू ठरला. त्याने 35 चेंडूत नाबाद 113 धावांची खेळी केली, ज्यात 12 षटकार आणि 7 चौकारांचा समावेश होता. या खेळीमुळे त्याच्या टीमला विजय मिळाला. याआधी, नोव्हेंबर 2023 मध्ये, त्याने अरुणाचल प्रदेश विरुद्ध विजय हजारे ट्रॉफीमध्ये 41 चेंडूत शतक केले होते. लिस्ट ए क्रिकेटमधील हे दुसरे सर्वात जलद शतक होते.17 ऑक्टोबर 1998 रोजी गुजरातच्या मेहसाणा येथे जन्मलेला उर्विल पटेल हा उजव्या हाताचा फलंदाज आहे. तो यष्टीरक्षक देखील आहे. देशांतर्गत क्रिकेटमध्ये तो एक आक्रमक फलंदाज म्हणून ओळखला जातो. उर्विलने बडोदा आणि गुजरात या राज्यांचे प्रतिनिधित्व केले आहे.

उर्विल पटेलच्या कारकिर्दीची सुरुवात 2018 मध्ये झाली. त्याने सैयद मुश्ताक अली ट्रॉफीमध्ये बडोद्याकडून टी20 मध्ये पदार्पण केले. त्याच वर्षी त्याने विजय हजारे ट्रॉफीमध्ये लिस्ट ए मध्येही पदार्पण केले. 2023-24 मध्ये त्याने रणजी ट्रॉफीमध्ये प्रथम श्रेणी क्रिकेटमध्ये पदार्पण केले होते.दरम्यान, उर्विल याने 11 बॉलमध्ये 31 धावांची दमदार खेळी केली. यामध्ये त्याने 4 षटकार आणि 1 चौकार मारला. 281 च्या स्ट्राईक रेटने त्याने आक्रमक फलंदाजी केली. पहिलाच सामना असतानाही कोणतेही दडपण न घेता त्याने केलेली फलंदाजी कौतुकास्पद होती. सीएसकेसुद्धा मधल्या फळीतील बॅट्समनच्या शोधात आहे. त्यामुळे आता उर्विल पटेल हा एक चांगला पर्याय उपलब्ध झाला आहे. जर उर्विलला सीएसकेने आपल्या ताफ्यात कायम ठेवलं तर नक्कीच सीएसकेची ताकद वाढणार आहे.