नाशिकमध्ये भीषण अपघात: पिकअपची चार वाहनांना धडक, भावासमोर बहिणीने सोडले प्राण.

अपघातावेळी पिकअप चालक दारूच्या नशेत होता, असं प्रत्यक्षदर्शींकडून सांगण्यात आलं आहे.भरधाव पिकअपने चार वाहनांना धडक दिल्याने नाशिकमध्ये भीषण अपघात झाला आहे. या अपघातात एक तरुणी जागीच ठार झाली असून अन्य तिघे गंभीर जखमी झाले आहेत. शहरातील म्हसरूळ पोलीस ठाण्याच्या हद्दीत हा अपघात घडला असून पोलिसांनी अपघातग्रस्त पिकअपच्या चालकाला ताब्यात घेतलं आहे.मिळालेल्या माहितीनुसार, जयश्री सोनवणे ही तरुणी तिच्या भावासोबत दुचाकीवरून जात होती. त्याचवेळी पाठीमागून आलेल्या पिकअप वाहनाने त्यांच्या दुचाकीला धडक दिली. या धडकेनंतर जयश्री आणि तिचा भाऊ सुमित हे दोघे दुचाकीवरून बाजूला पडले.

यावेळी रक्तबंबाळ झालेल्या जयश्रीचा जागीच मृत्यू झाला असून भाऊ सुमित सोनवणे जखमी झाला आहे.दरम्यान, पुढे जाऊन सदर पिकअपने आणखी दोन दुचाकी आणि एका चारचाकी वाहनालाही धडक दिली. या अपघातात दुसऱ्या दुचाकीवरील दोन तरुणही जखमी झाले आहेत. जखमींना रुग्णालयात दाखल करण्यात आलं असून सध्या त्यांच्यावर उपचार सुरू आहेत.अपघातानंतर पोलिसांनी पिकअप चालकाला ताब्यात घेतलं आहे.

यावेळी त्याच्याकडे चौकशी केली असता, वाहन चालवत असताना मांडीवर बसलेल्या माझ्या मुलाने अॅक्सेलेरेटरवर पाय दिल्याने अचानक वेग वाढला आणि हा अपघात झाल्याचा दावा चालकाने केला आहे. मात्र अपघातावेळी पिकअप चालक दारूच्या नशेत होता, असं प्रत्यक्षदर्शींकडून सांगण्यात आलं आहे. या अपघाताची नोंद पोलीस ठाण्यात करण्यात आली असून पोलिसांकडून अधिक तपास केला जात आहे.