अभिनेत्रीला भाची मानायचा पुजारी, गर्भपात करायला लावून निर्घृणपणे संपवलं; बॉडी टाकीत सापडली.

या लोकप्रिय अभिनेत्रीच्या हत्येनं सर्वांनाच धक्का बसला. जाणून घ्या या अभिनेत्रीच्या मृत्यूबद्दल.आज आपण एका अभिनेत्रीच्या मृत्यूची हृदयद्रावक कथा जाणून घेणार आहोत. ही कथा आहे तमिळनाडूतील कोइम्बतूर येथे राहणाऱ्या टीव्ही अभिनेत्री कुरुगंती अप्सराची. या अभिनेत्रीच्या पतीने आत्महत्या केली आणि त्यानंतर तिला स्वतःचं एक नवीन आयुष्य जगायचं होतं. तिने यासाठी योजनाही आखली आणि ती तिच्या मैत्रिणींसोबत कोईम्बतूरला जाणार होती. ती घरातून पळून गेली. पण ती तिच्या मैत्रिणींसोबत कोईम्बतूरला पोहोचलीच नाही आणि घरीसुद्धा परतली नाही. बऱ्याच दिवसांनी या अभिनेत्रीचा मृतदेह सेप्टिक टँकमध्ये कुजलेल्या अवस्थेत आढळला.कुरुगंती अप्सरा, घरातून कोईम्बतूरला निघाली तेव्हा तिने तिच्या शेजारी अयागरी साई कृष्णाकडे मदत मागितली. अयागरी हा बंगारू मियासम्मा मंदिर, सरूरनगर, हैदराबादचा पुजारी आहे. अभिनेत्री अनेकदा मंदिरात जात असल्यानं त्यानं अभिनेत्रीला ओळखलं. असं म्हटलं जातं की, अभिनेत्रीच्या आईने पुजाऱ्याला तिच्या भावासारखे वागवलं. अप्सराने जाण्यापूर्वी तिच्या आईला कळवलं होतं आणि तिच्या आईने तिला बसमध्ये चढल्यानंतर कळवण्यास सांगितलं होतं. अभिनेत्रीचा फोन आला नाही आणि मग चौकशी सुरू झाली. दुसऱ्या दिवशी सकाळी अभिनेत्रीच्या आईने तिला फोन केला तेव्हा तिचा फोन बंद होता.

ती काळजीत पडली आणि पुजाऱ्याकडे गेली. पुजाऱ्यानं आईला सांगितलं की, ती रात्री उशिरा तिच्या मैत्रिणींसह निघून गेली. जेव्हा त्यानं सांगितलं की, ती बसने नाही तर गाडीने निघाली आहे, तेव्हा कुटुंबातील सदस्यांना काळजी वाटली.यानंतर, कुरुगंतीची आई अरुणा यांनी पुजारीसह तिच्या मुलीचा शोध सुरू केला पण त्यांना अभिनेत्री सापडली नाही. अखेर ५ जून २०२३ रोजी तिच्या आईनं अभिनेत्री हरवल्याची तक्रार दाखल करण्याचा निर्णय घेतला. अप्सराला पाहणारा तो शेवटचा व्यक्ती असल्याने पुजाऱ्यानेही त्यांना मदत केली आणि त्यांच्यासोबत राजीव गांधी आंतरराष्ट्रीय विमानतळ पोलिस स्टेशनला गेला. त्याच्या जबाबाच्या आधारे गुन्हा दाखल करण्यात आला. त्याने पोलिसांना सांगितलं की, तो तिला त्याची भाची मानतो आणि त्याने ३ जूनच्या रात्री १०:३० वाजता तिला शमशाबाद येथील तिच्या मैत्रिणींकडे सोडलं आणि त्यानंतर अभिनेत्रीचा फोन बंद येत होता.पोलिसांनी तपास सुरू केला आणि अभिनेत्रीच्या मैत्रिणींची चौकशी केली असता कळलं की, ती शमशाबादला आली नव्हती. आता पोलिसांच्या निशाण्यावर पहिला व्यक्ती पुजारी होता आणि त्यानंतर सरूरनगर ते शमशाबाद या २१ किलोमीटरच्या मार्गाचे सर्व सीसीटीव्ही फुटेज तपासण्यात आले. पोलिसांनी कारवाई केली आणि पुजाऱ्याने त्याचा संपूर्ण गुन्हा कबूल केला. त्याने सांगितलं की, वाटेत तिला झोप येत होती. त्याने अभिनेत्रीचं डोकं गाडीच्या डॅशबोर्डवर आपटलं. जेव्हा ती ओरडू लागली तेव्हा त्याने गाडीत ठेवलेल्या एका जड दगडाने तिचा चेहरा चिरडला.

अभिनेत्रीची हत्या केल्यानंतर, पुजाऱ्याने तिचा मृतदेह दोन दिवस आपल्या गाडीत ठेवला आणि जेव्हा तिची आई तिचा शोध घेत होती तेव्हा तिचा मृतदेह त्याच गाडीत होता. वास येऊ नये म्हणून तो वारंवार रूम फ्रेशनर मारायचा. ज्या दिवशी पोलिसात अभिनेत्री बेपत्ता झाल्याची तक्रार दाखल करण्यात आली, त्याच दिवशी पुजाऱ्याने मृतदेह तिच्या घराजवळ आणि मंदिराजवळ असलेल्या सरकारी मंडळ महसूल कार्यालयाजवळ असलेल्या सेप्टिक टँकमध्ये टाकला.भास्करच्या रिपोर्टनुसार, पुजारी अनेक दिवसांपासून कुरुगंतीची हत्या करण्याचा कट रचत होता. पुजाऱ्याने सांगितलं की, २०२३ च्या सुरुवातीला कुरुगंती मंदिरात यायची, तेव्हा ते एकमेकांच्या प्रेमात पडले. मे २०२३ मध्ये अभिनेत्री पुजाऱ्यापासून प्रेग्नन्ट राहिली. अप्सरा त्यांच्या नात्याला नाव देऊ इच्छित होती पण पुजारी ते लपवून ठेवू इच्छित होता. तो आधीच विवाहित होता आणि बापही होता. शेवटी त्याने अप्सराला गर्भपात करण्यास भाग पाडलं. यानंतर, अप्सरा त्याला लग्न करण्यासाठी आग्रह करत राहिली पण जेव्हा तिला वाटलं की, हे शक्य नाही, तेव्हा तिने अफेअरबद्दल सर्वांना सांगेन असं सांगितलं. त्यामुळे पुजाऱ्याने अभिनेत्रीची हत्या केली.मार्च २०२५ मध्ये, रंगारेड्डी न्यायालयाने कुरुगंती अप्सरेच्या हत्येप्रकरणी दोषी आढळल्यानंतर पुजारी अयागरीला जन्मठेपेची शिक्षा सुनावली. यासोबतच १० लाख रुपयांचा दंड ठोठावण्यात आला, त्यापैकी ९ लाख ७५ हजार रुपये कुरुगंतीच्या कुटुंबाला देण्यास सांगण्यात आलं आहे.