प्रेक्षकांना फसवण्यासाठी सेलिब्रिटींचा वापर; IPL अवैध प्रक्षेपण घोटाळा प्रकरणात ‘ईडी’चा आरोप.

या गुन्ह्यातील ४००० कोटी रुपयांहून अधिक रक्कम वस्तूंच्या आयातींचे बनावट व्यवहार दाखवून विदेशांत पाठवून पुन्हा आरोपींच्या व संबंधित कंपन्यांच्या खात्यांवर भारतात वळवण्यात आल्याचे तपासात समोर आले आहे. ‘आयपीएलचे थेट प्रक्षेपण अवैधरित्या दाखवले जात असल्याची पूर्ण जाणीव असूनही त्याविषयी प्रेक्षकांची फसवणूक करून प्रक्षेपण वैध व अधिकृत असल्याचे भासवण्यासाठी फेअरप्ले संकेतस्थळाने चित्रपटसृष्टीतील अनेक सेलिब्रिटींचा ‘ब्रँड ॲम्बेसेडर’ म्हणून वापर केला’, असा आरोप सक्तवसुली संचालनालयाने (ईडी) आरोपपत्रात ठेवला आहे.‘या गुन्ह्यातील चार हजार कोटी रुपयांहून अधिक रक्कम वस्तूंच्या आयातींचे बनावट व्यवहार दाखवून विदेशांत पाठवून पुन्हा आरोपींच्या व संबंधित कंपन्यांच्या खात्यांवर भारतात वळवण्यात आल्याचे तपासात समोर आले’, अशी माहितीही ‘ईडी’ने आरोपपत्रात दिली आहे.आयपीएलच्या थेट प्रक्षेपणाचे अधिकृत हक्क आपल्याकडे असूनही ‘फेअरप्ले’ने अवैधरित्या थेट प्रक्षेपण दाखवून आमचे प्रचंड नुकसान केले, अशा तक्रारी दोन वर्षांपूर्वीच्या मालिकेविषयी ‘व्हायकॉम-१८ मीडिया प्रायव्हेट लिमिटेड’ कंपनीने केल्यानंतर मुंबई पोलिसांच्या सायबर कक्षाने ‘एफआयआर’ नोंदवला.

त्याआधारे ‘ईडी’ने गुन्हा नोंदवून तपास करत ११ आरोपींविरोधात नुकतेच आरोपपत्र दाखल केले. याची विशेष पीएमएलए न्यायालयाचे न्यायाधीश ए. सी. डागा यांनी गेल्या आठवड्यात दखल घेतली. या प्रकरणातील आरोपी चिराग शाह व चिंतन शाह हे भाऊ मागील दोन महिन्यांपासून कोठडीत आहेत.‘फेअरप्लेने आपल्या संकेतस्थळावर अधिकाधिक प्रेक्षकांनी आयपीएलच्या सामन्यांचे थेट प्रक्षेपण पाहण्याकरिता वळावे यासाठी वेगवेगळ्या माध्यमांवर खूप व्यापक प्रमाणात प्रसिद्धी केली. शिवाय हे प्रक्षेपण वैध व अधिकृत असल्याचे प्रेक्षकांना वाटावे याकरिता त्यांनी अभिनेता संजय दत्त, रणबीर कपूर, वरुण धवन, जॅकलिन फर्नांडिस, श्रद्धा कपूर, कियारा अडवाणी, तसेच क्रीडा क्षेत्रातील सायना नेहवाल, मेरी कोम, मिताली राज, एबी डी व्हिलियर्स, ग्रॅम स्मिथ व गायक बादशाह अशा सेलिब्रिटींचा ‘ब्रँड ॲम्बेसेडर’ म्हणून वापर केला. त्याविषयी विदेशी व भारतीय कंपन्यांनी या सेलिब्रिटींसोबत करारनामे केले. क्रिश लक्ष्मीचंद शाह हा फरार आरोपी या साऱ्या घोटाळ्याचा सूत्रधार आहे.

भारतीय तपास संस्था व नियामक यंत्रणांना सर्व गैरप्रकार शोधणे कठीण जावे म्हणून त्याने वेगवेगळ्या देशांत अनेक कंपन्यांची नोंदणी केली. प्ले व्हेंचर्स एन. व्ही, डच अँटिलेस मॅनेजमेंट एन. व्ही. या कंपन्यांची नोंदणी क्युरसाव या देशात करण्यात आली. तर फेअरप्ले स्पोर्ट एलएलसी व फेअरप्ले मॅनेजमेंट डीएमसीसी यांची नोंदणी दुबईमध्ये आणि प्ले व्हेंचर्स होल्डिंग लिमिटेडची नोंदणी मालटामध्ये केली. फेअरप्लेचे कामकाज प्रामुख्याने दुबईमधून शाहकडून होते. त्याला सिद्धांत अय्यर ऊर्फ जो पॉल हा आर्थिक कारभारात साह्य करतो. फेअरप्ले संकेतस्थळाची खरी मालकी कोणाची आणि ते नेमके कोण चालवले, हे स्पष्ट होऊ नये, या हेतूनेच विदेशांत कंपन्या स्थापन करण्यात आल्या. त्यामुळे भारतीय नियामक संस्थांना कारवाई करणे आव्हानात्मक ठरले’, असे ‘ईडी’ने आरोपपत्रात म्हटले आहे.‘लोकसभा निवडणुकीतही बेटिंगसाठी वापर’ ‘फेअरप्ले संकेतस्थळ अनेक अवैध बेटिंगच्या प्रकारांसाठीही वापरले जात असल्याचे तपासात निष्पन्न झाले. टेनिस, फुटबॉल, टेबल टेनिस, बॅडमिंटन व अन्य क्रीडा प्रकारांतील स्पर्धांमध्ये ऑनलाइन बेटिंगसाठी याचा वापर झाला. शिवाय २०२४ लोकसभा निवडणुकीतही हे संकेतस्थळ बेटिंगसाठी वापरण्यात आले’, असेही ‘ईडी’ने आरोपपत्रात नमूद केले आहे.