स्विमिंग पूलमध्ये पोहताना बुडून 9 वर्षांच्या ग्रंथचा मृत्यू, काँट्रॅक्टरचं चिमुरड्याकडेच अप्रत्यक्ष बोट.

मिरा-भाईंदर पालिकेने या मृत्यूप्रकरणी व्यवस्थापक कंत्राटदाराला नोटीस बजावली होती. त्यावर त्याने आता आश्चर्यकारक खुलासा सादर केला आहे.नऊ वर्षीय मृत ग्रंथने तरण तलावात पोहताना त्याला दिलेले जीवरक्षक साधन काढून टाकले होते, असा आश्चर्यकारक खुलासा तरण तलावाच्या कंत्राटदाराने केला आहे. म्हणजेच अप्रत्यक्षरित्या ग्रंथच्या स्वतःच्या चुकीमुळे ही दुर्घटना घडल्याचे कंत्राटदाराने उपरोधिक म्हटले आहे.भाईंदरच्या इंद्रलोक परिसरात मिरा-भाईंदर महापालिकेचे गोपीनाथ मुंडे क्रीडा संकुल आहे. भाईंदर महेश्वरी भवन रोडवर असणाऱ्या एका इमारतीत राहात असलेला नऊ वर्षीय ग्रंथ मुथा गेल्या रविवारी सकाळी ११ वाजताच्या सुमारास या तरण तलावात पोहायला शिकत होता. यावेळी अचानक पाण्यात बुडून त्याचा मृत्यू झाला. या घटनेनंतर येथील सुरक्षेबाबतच्या निष्काळजीबद्दल संपूर्ण शहरवासीयांकडून संताप व्यक्त करण्यात आला. नागरिकांनी रॅली काढून निषेधही व्यक्त केला.दरम्यान, मिरा-भाईंदर पालिकेने या मृत्यूप्रकरणी व्यवस्थापक कंत्राटदाराला नोटीस बजावली होती. त्यावर त्याने आता आश्चर्यकारक खुलासा सादर केला आहे. हा खुलासा ‘महाराष्ट्र टाइम्स’च्या हाती लागला आहे.

यात त्याने त्याच्याकडून सुरक्षेच्या दृष्टीने सर्व उपाययोजना करण्यात आल्या होत्या. मात्र, मृत ग्रंथने पोहताना त्याला दिलेले जीवरक्षक साधन काढून टाकले होते. पालिकेसोबत झालेल्या करारानुसार सुरक्षा उपाययोजना, जसे की प्रशिक्षित जीवरक्षकाची नियुक्ती, सुरक्षा उपकरणांची उपलब्धता व उपकरण तपासणी आदी कार्यवाही करण्यात आल्याचे कंत्राटदाराने म्हटले आहे.याशिवाय रविवारी घटना घडली, तेव्हा तलावाजवळ चार जीवरक्षक उपस्थित होते. तलावात पोहणाऱ्या सर्वांना तरंगण्याचे जीवरक्षक साधन (फ्लोटेशन एड्स) त्यांच्याकडून दिली गेली होती. तसेच ते सर्वांनी लावले होते का? याची खातरजमा जीवरक्षकांकडून केली जात होती. मात्र, ग्रंथने स्वतःहून फ्लोटर बाहेर काढून ठेवत, तो तलावात पोहण्याकरता उतरला, असे यात नमूद केले आहे. यावरून जीवरक्षकाने ग्रंथ तलावात सुरक्षा साधनांविना उतरून पोहोत असल्याच्या बाबीकडे दुर्लक्ष केल्यामुळे मृत्यू झाल्याचे निष्पन्न होते.

मात्र, तरीही कंत्राटदाराकडून आश्चर्यकारकरीत्या मृत्यूस ग्रंथची चूक कारणीभूत असल्याचे खुलाशात भासवले जात आहे. त्या आधारे कंत्राटदाराकडून कंत्राट रद्द करण्यासारखी कारवाई न करण्याची मागणी देखील करण्यात आली आहे. ग्रंथने गतवर्षी पोहण्यासाठी आयोजित केलेल्या शिबिरातही प्रवेश घेतला असल्याची माहिती खुलाशात देत त्याला तलाव व पोहण्याची माहिती असल्याचे कंत्राटदाराकडून दाखवण्याचा प्रयत्न केला गेला आहे.पालिकेमार्फत तरण तलाव चालवण्याचे कंत्राट एका चॅरिटेबल ट्रस्टला देण्यात आले असले, तरी अप्रत्यक्षरीत्या हे काम एका स्थानिक बड्या नेत्याच्या निकटवर्तीयाकडून केले जात असल्याचे म्हटले जात आहे. मृत्यू प्रकरणामुळे त्याच्या अडचणी वाढण्याची शक्यता नाकारता येत नाही. म्हणून हे प्रकरण दडपण्याचा प्रयत्न केला जाण्याची शक्यता वर्तवली जात आहे.तरण तलावात मृत्यू प्रकरणाला कंत्राटदाराइतकेच पालिकेच्या संबंधित विभागाचे अधिकारी देखील जबाबदार असल्याचा आरोप केला जात आहे. त्याच अधिकाऱ्यांवर प्रकरणाच्या चौकशीची जबाबदारी देण्यात आली आहे. त्यामुळे योग्यरीतीने चौकशी होणार नसल्याचे सांगत, संबंधित अधिकाऱ्यांना समितीतून वगळण्याची मागणी केली जात आहे.