ना काही संबंध ना वाद, मग अविनाशला का मारलं? नागपूर कॅफे मालकाला संपवण्याचं हादरवणारं कारण.

नागपुरात एका कॅफे मालकाची हत्या करण्यात आली होती. ही हत्या टोळी युद्धातून करण्यात आल्याचं आता समोर आलं आहे. तसा, अविनाश भुसारी यांचा या टोळीशी काही थेट संबंध नव्हता.अंबाझरी पोलीस ठाण्याच्या हद्दीत गोकुळपेठ परिसरातील ‘सोशा कॅफे’चे संचालक अविनाश राजू भुसारी (वय २८) यांच्या हत्या प्रकरणात पोलिसांना मोठे यश मिळाले आहे. पोलिसांच्या गुन्हे शाखेने केलेल्या विशेष मोहिमेत बंटी उर्फ शैलेश विनोद हिरणवारसह पाच आरोपींना उत्तर प्रदेशातून अटक करण्यात आली आहे. अटक करण्यात आलेल्या आरोपींमध्ये बंटी हिरणवार, बाबू हिरणवार, आदर्श वाळके, दीपू मेश्राम आणि शिबू यादव यांचा समावेश आहे.१४ एप्रिल २०२५ रोजी मध्यरात्री अविनाश भुसारी यांच्यावर गोळ्या झाडून निर्घृण हत्या करण्यात आली होती. तपासादरम्यान उघड झाले की, फरार शेखू टोळीशी सुरू असलेल्या वादातून बंटी व बाबू हिरणवार यांनी इतर साथीदारांच्या मदतीने हा हल्ला घडवून आणला होता. विशेष बाब म्हणजे अविनाश भुसारी यांचा या वादाशी थेट काहीही संबंध नव्हता. फक्त शेखू टोळीतील अविराज उर्फ अवि भुसारी यांचे नातेवाईक असल्यामुळे त्यांना लक्ष्य करण्यात आले.

पवन हिरणवारच्या हत्येचा बदला घेण्यासाठी शेखू खान टोळीविरोधात कट रचण्यात आला होता. बंटी हिरणवार व साथीदारांनी प्रवेश गुप्ता आणि धीरज बांबुर्डे यांना लक्ष्य केले होते. आंबेडकर जयंतीला पांढरा बोडी परिसरात मिरवणूक काढणाऱ्या प्रवेश गुप्तावर १४ एप्रिलला हल्ला करून दंगल घडवण्याचा मारेकऱ्यांचा डाव होता. पोलीस बंदोबस्तामुळे तपासात अडथळा येईल, असा त्यांचा अंदाज होता. मात्र, गुप्ता आणि बांबुर्डे मिरवणुकीत सहभागी झाले नाहीत, त्यामुळे ते थोडक्यात बचावले.या हत्येसाठी वापरलेल्या शस्त्रास्त्रांसाठी बंटीच्या आजी किरण हिरणवार यांच्या १ लाख २० हजार रुपयांची चोरी करण्यात आली. शिबू यादवने पैसे चोरले आणि त्यातून बंटीने मध्यप्रदेशातील रिवा येथून तीन पिस्तूल खरेदी केली. याशिवाय राहुलने उत्तरप्रदेशातून २० काडतूस आणले. जंगलातील दारुपार्टीत शेखू टोळीच्या सदस्यांचा खून करण्याचा कटही रचला गेला होता.घटनेनंतर आरोपी फरार झाले होते आणि पोलिसांसमोर मोठे आव्हान निर्माण झाले होते.

आरोपी सतत आपले ठिकाण बदलत होते आणि फार काळ एकाच ठिकाणी न थांबत तांत्रिक विश्लेषणाला गुंगारा देत होते. सुरुवातीला पोलिसांनी अल्पवयीन आरोपी व आकाश शेंद्रे यांना अटक केली होती. त्यानंतर, बंटीच्या जवळच्या मित्र ऋषभ वानखेडे व मैत्रीण सिमरन लोखंडे यांना आरोपींना मदत केल्याप्रकरणी अटक करण्यात आली.गुन्हा केल्यानंतर आरोपी भंडारा, कोलकाता, विशाखापट्टनम, तिरुपती बालाजी, बल्लारशाह, गोंदिया अशा विविध ठिकाणी फिरत राहिले. मात्र, पोलिसांनी तांत्रिक माहितीच्या आधारे त्यांच्या हालचालींवर लक्ष ठेवले आणि योग्यवेळी पथके पाठवून सर्व आरोपींना शिताफीने अटक केली. नवेगाव बांध रेल्वे स्थानकावरून मुख्य आरोपी बंटी हिरणवार व त्याचे साथीदार तर गोंदिया बस स्थानकावरून इतर आरोपींना पकडण्यात आले.ही कारवाई पोलीस आयुक्त रविंद्र सिंघल, सह आयुक्त निसार तंबोली, अप्पर आयुक्त संजय पाटील आणि उपायुक्त (डिटेक्शन) राहुल माकणीकर यांच्या मार्गदर्शनाखाली पार पडली. या कारवाईमुळे नागपूर शहरात मोठा दिलासा व्यक्त केला जात असून, उर्वरित फरार आरोपींच्या शोधासाठी तपास अधिक वेगाने सुरू आहे.