कोणताही देश १०० टक्के अचूक गुप्तचर माहितीची हमी देऊ शकत नाही… पहलगाम हल्ल्यानंतर शशी थरूर यांचं मोठं विधान.

 काँग्रेस खासदार शशी थरूर यांनी पहलगाम येथील दहशतवादी हल्ल्याबाबत प्रतिक्रिया दिली. हा हल्ला गुप्तचर यंत्रणेचं अपयश असल्याचं ते म्हणाले. त्यांनी या हल्ल्याची तुलना इस्रायलवरील हमासच्या हल्ल्याशी केली. अनेकदा हल्ले रोखले जातात, पण अपयश आलं की चर्चा होते, असंही थरूर म्हणाले. काँग्रेस खासदार शशी थरूर यांनी २२ एप्रिल रोजी पहलगाम येथे झालेला दहशतवादी हल्ला हा गुप्तचर यंत्रणेचं अपयश असल्याचं म्हटलं आहे. त्यांनी या हल्ल्याची तुलना ७ ऑक्टोबर २०२३ रोजी हमासने इस्रायलवर केलेल्या हल्ल्याशी केली आहे.’गुप्तचर माहिती पूर्णपणे अचूक नव्हती. यामध्ये काही अपयश आलं. पण आपल्याकडे इस्रायलचं उदाहरण आहे, ज्याला जगातील सर्वोत्तम गुप्तचर सेवांपैकी एक मानलं जातं, तरीही त्यांच्यावर हल्ला करण्यात आला. दोन वर्षांपूर्वी ७ ऑक्टोबर रोजी त्यांच्यावरील हल्ल्याने सर्वांनाच हैराण करण्यात आलं. आपण आधी सध्याच्या संकटावर मात केली पाहिजे आणि नंतर सरकारकडून जबाबदारीची मागणी केली पाहिजे.

कोणताही देश १००% अचूक गुप्तचर माहितीची हमी देऊ शकत नाही.’थरूर म्हणाले की, ‘अनेक वेळा दहशतवादी हल्ले यशस्वीरित्या रोखले जातात. तेव्हा त्याची चर्चा होती नाही, तेव्हा याकडे कोणीही लक्ष देत नाही. पण जेव्हा ते हल्ले थांबवण्यात अपयशी ठरतात, तेव्हा त्यांच्याबद्दल चर्चा होते. काही कमतरता आहे, पण सध्या लक्ष संकटावर केंद्रित केलं पाहिजे. लगेच कोणालाही दोष देऊ नये.’दरम्यान, २२ एप्रिल रोजी जम्मू – काश्मीरमधील पहलगाममध्ये झालेल्या दहशतवादी हल्ल्यानंतर संपूर्ण देशात संतापाची लाट उसळली आहे. या हल्ल्यात २६ नागरिकांचा मृत्यू झाला. या हल्ल्याचा एनआयएकडून तपास सुरू आहे.

शांत आणि सुंदर बैसरन खोऱ्यात हा भयानक हल्ला झाल्यानंतर आयजी, डीआयजी आणि एसपी यांच्या नेतृत्वाखालील पथकं चौकशी करत आहेत. काश्मीरमधील सर्वात भीषण दहशतवादी हल्ल्यांपैकी एक असलेल्या या हल्ल्याला कारणीभूत ठरलेल्या घटनांचा क्रम समजून घेण्यासाठी प्रत्यक्षदर्शींची बारकाईने चौकशी केली जात आहे.दहशतवाद्यांच्या कारवाया तपासण्यासाठी एनआयएचं पथक त्यांच्या प्रवेशाच्या आणि हल्ल्यानंतर बाहेर पडलेल्या ठिकाणांची बारकाईने तपासणी करत आहेत. या हल्ल्यामागील कट उलगडण्यासाठी फॉरेन्सिक आणि इतर तज्ञांच्या मदतीने पथकं संपूर्ण परिसराची कसून तपासणी करत आहेत.