नदीवर कपडे धुवायला गेले आणि भयंकर घडलं, चिपळूणमध्ये माय-लेक आणि आत्याचा दुर्दैवी अंत.

चिपळूण तालुक्यातील रामवाडी येथे वाशिष्ठी नदीच्या डोहात कपडे धुण्यासाठी गेलेल्या दोन महिला आणि एका आठ वर्षाच्या मुलाचा बुडून मृत्यू झाला. लहान मुलगा खेळताना पाय घसरून पाण्यात पडला आणि त्याला वाचवण्याच्या प्रयत्नात दोन्ही महिलांचाही बुडून मृत्यू झाला. या दुर्दैवी घटनेमुळे परिसरात शोककळा पसरली आहे.रत्नागिरीतील चिपळूण तालुक्यात आलोरे शिरगाव हद्दीतील रामवाडी येथे कपडे धुण्यासाठी आलेल्या दोन महिला व एका आठ वर्षाच्या मुलाचा बुडून मृत्यू झाल्याची दुर्दैवी घटना घडली आहे. शुक्रवारी सकाळच्या सुमारास ही दुर्दैवी घटना घडली. यामध्ये रेणुका धोंडीराम शिंदे वय ४५ , राहणार रामवाडी (पिंपळी खुर्द) आणि लता शशिकांत कदम, वय ३५, पिंपळी वरची वाडी, लक्ष्मण शशिकांत कदम वय ८ वर्ष, (राहणार पिंपरी) यांचा समावेश आहे.यावेळी वशिष्ठी नदीच्या काठावर उभी असलेल्या सोळा वर्षीय पूजा शिंदे हिच्या हा सगळा प्रकार लक्षात येताच तिने आरडाओरडा केला. मात्र आजूबाजूला कोणी नव्हते. त्यामुळे तिने प्रसंगावधान राखत तात्काळ घरी फोन करून सगळा प्रकार सख्खा भाऊ शुभम शिंदे याला सांगितलं. त्यावेळी तिचा भाऊ, मावस भाऊ सचिन कुंभार कामावर गेले होते.

ते तात्काळ वीट भट्टीच्या कामावरून दुचाकीवरून घटनास्थळी दाखल झाले, मात्र तोवर उशीर झाला होता. या सगळ्या घटनेत पूजा धोंडीराम शिंदे ही मयत झालेल्या रेणुका शिंदे यांची मुलगी असून ती या घटनेची प्रत्यक्षदर्शी साक्षीदार ठरली आहे. सुदैवाने ती पाण्यात न गेल्याने सुखरूप बचावली.महिला आणि काही घरातील मुलं अकरा ते बारा वाजण्याच्या सुमारास कपडे धुण्यासाठी खडपोली रामवाडी येथील वाशिष्ठी नदीच्या डोहावरती गेले होते. यावेळी सोबत असणारा लहान मुलगा पाण्यात काठावर बसून खेळत होता. नदीमध्ये मोठ्याप्रमात शेवाळ असल्याने तो पाय घसरून पाण्यात पडला. त्याला वाचवण्यासाठी त्याची आई लता कदम या पाण्यात गेल्या असता त्यांना देखील पाण्याचा अंदाज न आल्याने त्या पाण्यात बुडू लागल्या. त्यावेळी त्यांची आत्या रेणुका शिंदे या बुडत असलेल्या दोघांना वाचवण्यासाठी पाण्यात उतरल्या आणि त्याही पाण्यात बुडायला लागल्या.

याचवेळी काठावर बसलेली त्याची मुलगी पूजा शिंदे हिने आरडाओरड केली पण आजूबाजूला कोणी नव्हते. त्यानंतर तिने सख्खा भाऊ शुभम शिंदे, वय २० वर्ष याला फोन करून घटना सांगितली.वीट भट्टीच्या कामावरून दोघे भाऊ घटनास्थळी दाखल झाले. पण तोपर्यत तिघांचाही पाण्यात मृत्यू झाला होता. दोन्ही भावांनी मिळून तीन मृत व्यक्तींना पाण्याबाहेर काढलं. वशिष्ठी नदीचा डोह हा मयत मुलगा आणि दोन महिला बुडाल्या त्या ठिकाणी साधारण १२ ते १४ फूट खोल आहे. तिथे नदीचं पाणी वाहतं आहे. या सगळ्या घटनेची माहिती तात्काळ पोलिसांना देण्यात आली. चिपळूणचे पोलीस उपविभागीय अधिकारी राजेंद्र राजमाने आणि अलोरे पोलीस ठाणे पोलिसांकडून घटनास्थळाचा पंचनामा करुन पुढील कार्यवाही करण्यात आली.यावेळी उपविभागीय पोलीस अधिकारी राजेंद्र कुमार राजमाने व आलोरे पोलीस ठाणे प्रभारी अधिकारी भरत पाटील आणि कर्मचारी उपस्थित होते. या दुर्दैवी घटनेने परिसरात हळहळ व्यक्त केली जात आहे. या घटनेची नोंद आलोरे पोलीस ठाण्यात करण्यात आली आहे.