अमेरिकेत ट्रम्प यांच्याविरोधात निदर्शने, आंदोलक रस्त्यांवर उतरुन मोर्चे; कारण काय.

डोनाल्ड ट्रम्प यांच्याविरोधात अमेरिकेत मोर्चे काढण्यात आले असून ठिकठिकाणी रस्त्यावर उतरुन त्यांच्या भूमिकेचा निषेध करण्यात आला.अमेरिकेचे अध्यक्ष डोनाल्ड ट्रम्प यांच्या धोरणांच्या विरोधात अमेरिकेत ठिकठिकाणी मोर्चे काढण्यात आले. देशाच्या लोकशाही मूल्यांना ट्रम्प प्रशासनाकडून धोका असल्याचा आरोप त्यांच्या विरोधकांनी केला. न्यूयॉर्क, वॉशिंग्टनसह देशभरात ही आंदोलक जमले होते. न्यूयॉर्कमधील मॅनहॅटनमध्ये ठिकठिकाणी निदर्शक जमले होते. काहींनी मार्च काढला होता. याशिवाय वॉशिंग्टनमध्ये व्हाइट हाउससमोर रॅली काढण्यात आली होती. १९ एप्रिल १७७५ रोजी अमेरिकेतील क्रांती युद्ध सुरू झाले. अडीचशे वर्षांपूर्वीच्या या युद्धाचे स्मरण या वेळी करण्यात आले. थॉम बासफोर्ड या निदर्शनांत सहभागी झाले होते. लेक्झिंटनची लढाई आणि बोस्टन जवळ झालेला शांतता समझोता याचे नाट्य रूपांतर सादर करण्यात आले. त्यात ८० वर्षीय बासफोर्ड सहभागी झाले होते.

खाणकामगार असलेले बासफोर्ड निवृत्त झाले आहेत. ‘अमेरिकी नागरिकांवर स्वत:चे सरकारच हल्ला करीत असल्याचे मला वाटते आणि त्याविरोधात उभे राहायची गरज आहे,’ असे ते म्हणाले.‘अमेरिकेत स्वातंत्र्याबाबत अत्यंत धोकादायक काळ आला आहे. मुलांनी आपल्या इतिहासाची मुळे जाणून घ्यावीत. एकेकाळी आपल्याला स्वातंत्र्यासाठी लढवा लागले होते,’ असेही बासफोर्ड म्हणाले होते. या वेळी त्यांच्यासोबत त्यांची पत्नी, मुलगी आणि दोन नातूही आले होते.डेनवरमध्ये शेकडो निदर्शक कॉलोराडो स्टेट कॅपिटॉल इमारतीबाहेर जमले होते. स्थलांतरितांबद्दल सहानुभूती दाखवणारे फलक त्यांनी हातात घेतले होते. याशिवाय ट्रम्प प्रशासनाला ‘हँड्स ऑफ’ असा इशारा देणारे फलकही काही निदर्शकांकडे होते. काहींनी अमेरिकेचे झेंडे फडकावले.

ऑरेगॉनमधील पोर्टलँडमध्येही हजारो निदर्शकांनी मार्च काढला. सॅन फ्रान्सिस्कोमध्ये शेकडो निदर्शकांनी ट्रम्प यांच्याविरोधात समुद्रकिनारी वाळूत ‘इम्पिच अँड रिमुव्ह’ अशा घोषणा लिहिल्या. अलास्कातील अँकरेज येथेही लोक जमले होते.अध्यक्ष ट्रम्प यांचे सल्लागार, अब्जाधीश एलन मस्क यांच्या टेस्ला कंपनीच्या डीलर शोरूमबाहेरही काहींनी निदर्शने केली. अमेरिकेतील केंद्रीय सरकारच्या निधीत कपात करण्याच्या मस्क यांच्या भूमिकेचा निषेध करण्यात आला. दोन आठवड्यांपूर्वीच ट्रम्प प्रशासनाविरोधात अमेरिकेत निदर्शने करण्यात आली होती. त्यानंतर शनिवारी पुन्हा आंदोलक रस्त्यांवर उतरले.