दादर स्थानकातून प्रवास करत असाल तर ही बातमी एकदा वाचाच, प्रवाशांसाठी रेल्वेकडून महत्त्वाची माहिती.

दादर स्थानकातून प्रवास करणाऱ्या प्रवाशांसाठी महत्त्वाची बातमी आहे. दादर स्थानकातील पुलाबाबत रेल्वेकडून माहिती देण्यात आली आहे.मध्य तसंच पश्चिम रेल्वेवरील दादर हे मध्यवर्ती स्थानक आहे. दोन्ही उपनगरीय स्थानकातून दादरमध्ये येणाऱ्या – जाणाऱ्या प्रवाशांनी तुफान गर्दी असते. या गर्दीवर काही प्रमाणात नियंत्रण मिळवण्यासाठी आतापर्यंत स्थानकावर अनेक बदल करण्यात आले. प्लॅटफॉर्मची रुंदी, तसंच कर्जतकडे येणाऱ्या लाइवरवर दोन्ही बाजूला प्लॅटफॉर्म, एक्स्कलेटर अशा अनेक गोष्टी नव्याने दादर स्थानकात करण्यात आल्या. याच दादर स्थानकाबाबत आता पुन्हा एकदा महत्त्वाची माहिती समोर आली आहे.दादर स्थानकातील पश्चिम रेल्वे मार्गाच्या प्लॅटफॉर्म क्रमांक ४ बाबत महत्त्वाची माहिती आहे.

पश्चिम रेल्वेच्या ४ नंबर प्लॅटफॉर्मवर असणाऱ्या पादचारी पुलाचं काम रेल्वेकडून हाती घेण्यात आलं आहे. या कामामुळे प्लॅटफॉर्म क्रमांक ४ वरील पादचारी पुलाच्या पायऱ्या बंद ठेवण्यात आल्या आहेत. एप्रिलच्या अखेरपर्यंत हे काम पूर्ण होणार असल्याची शक्यता आहे. त्यामुळे ३० एप्रिलपर्यंत या पुलाच्या पायऱ्या बंद असणार आहेत.पश्चिम रेल्वेच्या ४ नंबर प्लॅटफॉर्मवरील पादचारी पुलाच्या पायऱ्या ३० एप्रिलपर्यंत बंद राहणार आहेत. प्रवाशांनी पर्यायी व्यवस्थेचा वापर करण्याच्या सूचना पश्चिम रेल्वेकडून देण्यात आल्या आहेत.रेल्वेने अधिकृत निवेदनात दिलेल्या माहितीनुसार, दुरुस्तीचं काम सुरळीतपणे पूर्ण करण्यासाठी प्लॅटफॉर्म क्रमांक ४ वरील उत्तरेकडील पायऱ्या तात्पुरत्या बंद करण्यात येत आहेत.

यामुळे प्रवाशांना काही गैरसोय होऊ शकते, परंतु हे काम त्यांच्या सुरक्षितता आणि सुविधा सुधारण्यासाठी केलं जात आहे. या पायऱ्या बंद असताना प्रवाशांनी पर्यायी मार्गाचा वापर करण्याचंही सांगण्यात आलं आहे.दरम्यान, दादर पश्चिमेकडील प्लॅटफॉर्मसह गोरेगाव स्थानकातही पादचारी पूल बंद ठेवण्यात आला आहे. पादचारी पुलाची पुनर्बांधणी करण्यात येणार आहे. त्याच्या तोडकामासाठी पूल बंद करण्यात आला आहे. ऑक्टोबर २०२५ पर्यंत पुलाचं काम पूर्णत्वास येईल, तोपर्यंत पूल बंद ठेवला जाणार आहे.