मृत व्यक्ती 5 वर्षांनी जिवंत सापडला; मार्केटिंग सोडून स्वत:ला संपवलं; चक्रावून टाकणारं प्रकरण.

स्वत:च्याच हत्येची खोटी कहाणी रचून त्यानं ओळख बदलली आणि दुसऱ्या शहरात जाऊन राहू लागला. आरोपीनं त्याची पत्नी आणि मुलांशी संपर्क साधण्यासाठी दुसऱ्या मोबाईल नंबरचा वापर सुरु केला. त्यानंतर या प्रकरणाचा उलगडा झाला.लखनऊ: स्वत:च्याच हत्येची खोटी कहाणी रचून त्यानं ओळख बदलली आणि दुसऱ्या शहरात जाऊन राहू लागला. आरोपीनं त्याची पत्नी आणि मुलांशी संपर्क साधण्यासाठी दुसऱ्या मोबाईल नंबरचा वापर सुरु केला. त्यानंतर या प्रकरणाचा उलगडा झाला. नव्या नंबरला ट्रेस करत पोलीस आरोपीपर्यंत पोहोचले आणि त्याला लखनऊमधून अटक केली. उत्तर प्रदेशच्या आजमगढमध्ये चक्रावून टाकणारी घटना घडली आहे. आजमगढ पोलिसांनी ५ वर्षांपूर्वी मृत्यू पावलेल्या अरविंद चौहान नावाच्या व्यक्तीला अटक केली आणि त्याला लखनऊमधील कोर्टात जिवंत हजर केलं. अरविंद मूळचा जहानागंज पोलीस ठाण्याच्या हद्दीत येणाऱ्या इदिलपूर पुनरजीचा रहिवासी आहे.अरविंद चौहान फायनान्शियल कंपनी अल्केमिस्ट लिमिटेडमध्ये मार्केटिंग एजंट म्हणून काम करायचा.

२००६ ते २०१७ या कालावधीत त्यानं त्याच्या नातेवाईक आणि ओळखीच्या लोकांकडून कोट्यवधी रुपये घेतले आणि ते कंपनीत गुंतवले. २०१७ मध्ये कंपनीनं गाशा गुंडाळला. ज्या लोकांनी अरविंदच्या माध्यमातून कंपनीत गुंतवणूक केली होती, ते लोक त्याच्या दारावर आले. पैशांची मागणी करु लागले. अरविंदकडे द्यायला पैसेच नव्हते. यातून स्वत:ला बाहेर काढण्यासाठी त्यानं स्वत:च्या हत्येचा बनाव रचला.३० जुलै २०१९ मध्ये वेद प्रकाश चौहान नावाच्या व्यक्तीनं त्याचा भाऊजी अरविंद चौहान बेपत्ता असल्याची तक्रार पोलिसात नोंदवली. पोलिसांनी तपास सुरु केला. काही दिवसांनंतर अरविंदची पत्नी सुनीता चौहाननं न्यायालयात वासुदेव चौहान नावाच्या व्यक्तीनं आपल्या पतीची हत्या केल्याचा दावा केला. वासुदेवनं अरविंदला ४.४२ लाख रुपये दिले होते. त्यामुळे अरविंदच्या पत्नीना वासुदेवला अडकवत पोलिसांची दिशाभूल करण्याचा प्रयत्न केला.प्राथमिक तपासातून पोलिसांना शंका आली.

बेपत्ता असलेल्या अरविंद विरोधात जहानागंजमध्ये फसवणुकीचा गु्न्हा आधीपासूनच दाखल होता. या सगळ्या षडयंत्रात अरविंदची पत्नी सुनीतानं त्याची साथ दिली. पोलिसांनी सुनीताचे कॉल डिटेल्स रेकॉर्ड (CDR) काढले. त्यातील काही नंबरवर सुनीता वारंवार व्हॉट्सऍपच्या माध्यमातून संवाद साधायची. पोलिसांनी तो नंबर ट्रेस केला. तो लखनऊचा होता. याच नंबरच्या आधारे पोलिसांनी माग काढला आणि अरविंदला बेड्या ठोकल्या.पोलिसांनी अरविंदची चौकशी केली. त्यात त्यानं गुन्ह्याची कबुली दिली. १९ जुलै २०१९ च्या सकाळी कोणालाही न सांगता अरविंदनं घर सोडलं होतं. अनेक जण पैसे मागण्यासाठी येत असल्यानं अरविंद घर सोडून गेला होता. तो लखनऊमध्ये भाड्याच्या घरात राहात होता. ओळख बदलून तो तिथे रिक्षा चालवायचा. काही दिवसांनंतर त्यानं नवा मोबाईल घेतला आणि पत्नी, मुलांशी संवाद साधू लागला. पत्नीदेखील लहान मुलांना सोबत घेऊन लपूनछपून अरविंदला भेटण्यासाठी लखनऊला जायची.