वेगात झाडावर आदळली अन् दुचाकी जळून खाक, दोन सख्ख्या भावांचा एकत्र अंत, कुटुंबाचा आक्रोश.

भरधाव वेगात असलेल्या दुचाकीवरील नियंत्रण सुटलं आणि दुचाकी थेट झाडाला आदळली. या घटनेत दोन सख्ख्या भावांसह तिघांनी आपला जीव गमावला आहे.भरधाव वेगाने जाणाऱ्या दुचाकीस्वाराचे नियंत्रण सुटल्याने दुचाकी झाडाला आदळून दोन सख्ख्या भावंडांसह तिघांचा दुर्दैवी मृत्यू झाला आहे. ही घटना १७ एप्रिल रोजी सकाळच्या सुमारास चामोर्शी तालुक्यातील घोट रस्त्यावरील ठाकूरनगर पहाडीजवळ घडल्याची माहिती आहे. हा अपघात इतका भीषण होता की दुचाकी झाडाला आदळताच पेटली आणि जळून खाक झाली.सौरभ सुभाषित चक्रवर्ती (वय २०), साहेब सुभाषित चक्रवर्ती (वय १६, दोघेही राहणार वसंतपूर ता. चामोर्शी) आणि विशाल भूपाल बाछाड (वय १९, रा. सिरपूर, जिल्हा कोमरमभीम, तेलंगाणा) असे दुचाकी अपघातात ठार झालेल्या तरुणांची नाव आहेत.

यामधील सौरभ आणि साहेब हे दोघे सख्खे भाऊ होते. तर, विशाल बाछाड नातेवाईक असल्याची माहिती आहे.या प्रकरणाच्या मिळालेल्या प्राप्त माहितीनुसार, विशाल, सौरभ आणि साहेब हे तिघेजण १७ एप्रिल रोजी आपल्या वसंतपूर येथून काही कामानिमित्ताने घोटकडे चालले होते. या दरम्यान, घोट पोलीस मदत केंद्र हद्दीतील ठाकूरनगर पहाडी जवळील वाळणावर दुचाकीवरील नियंत्रण सुटलं आणि दुचाकी रस्त्याच्या कडेला असलेल्या जंगलात एका भल्यामोठ्या सागवान झाडाला धडकली. यात सौरभ, साहेब या दोन सख्ख्या भावंडांसह नातेवाईक असलेल्या विशाल नावाच्या तरुणाचा देखील दुर्दैवी मृत्यू झाला. विशेष म्हणजे या अपघातात दुचाकीने पेट घेतला आणि अपघातस्थळी जळून क्षितिग्रस्त झाला. विशाल बाछाड हा दुचाकी चालवत होता अशी माहिती समोर येत आहे.सौरभ चक्रवर्तीने नुकतीच बारावीची तर साहेब चक्रवर्ती याने दहाव्या वर्गाची परीक्षा दिली होती. या घटनेची माहिती मिळताच घोट पोलीस मदत केंद्राचे प्रभारी अधिकारी नितेश गोहणे आपल्या पथकासह घटनास्थळी दाखल झाले. तिन्ही मृतदेह चामोर्शी तालुका मुख्यालयातील ग्रामीण रुग्णालयात शवविच्छेदनासाठी पाठविण्यात आले आहे. या घटनेचा पुढील तपास घोट पोलीस मदत केंद्राचे प्रभारी अधिकारी नितेश गोहणे यांच्या मार्गदर्शनाखाली सुरू आहे. घटनास्थळी तरुणांच्या घरच्यांनी एकच आक्रोश केला.