भाजपात बदलाचे वारे, मुंबईत हायव्होल्टेज बैठक, पुणे शहराध्यक्षपदीही भाकरी फिरणार, निकष ठरला.

भाजपचे विद्यमान शहराध्यक्ष धीरज घाटे यांचा कार्यकाळ पूर्ण होत आला आहे. भाजपचे मागील तीन अध्यक्ष पाहता मराठा आणि ब्राह्मण समाजाला प्राधान्य देण्यात आल्याचे चित्र दिसले आहे.भारतीय जनता पक्षाच्या संघटनेमध्ये राष्ट्रीय स्तरापासून पुणे शहरापर्यंत बदलाचे वारे वाहत असून, पुण्यात या वेळी इतर मागासवर्गीय (ओबीसी) घटकातील नेत्याला शहराध्यक्षपदी संधी दिली जाईल, अशी वरिष्ठ पातळीवर चर्चा सुरू आहे. प्रदेशाध्यक्षपदी रवींद्र चव्हाण यांची नियुक्ती झाल्यानंतर राज्यातील संघटनेमध्ये तातडीने बदल करण्यात येणार आहे. त्यामध्ये पुण्याच्या शहराध्यक्षपदाचाही समावेश आहे.भाजपच्या संघटनेमध्ये फेरबदलाचे वारे जोरदार वाहत आहेत. भाजपच्या प्रदेशाध्यक्षपदी माजी मंत्री रवींद्र चव्हाण यांच्या नावाची घोषणा बाकी आहे. त्यांच्याकडे जबाबदारी देण्यात आली असली तरी औपचारिक नियुक्ती बाकी आहे. विधानसभेच्या निवडणुकीनंतर प्राथमिक सदस्यत्व नोंदणीची मोहीम हाती घेण्यात आली असून, या मोहिमेचे नेतृत्व चव्हाण यांच्याकडे होते. त्यामध्ये पुण्यातही मोठ्या प्रमाणात नोंदणी झाली असून, त्याचे पक्षस्तरावर कौतुकही करण्यात आले आहे.भाजपचे विद्यमान शहराध्यक्ष धीरज घाटे यांचा कार्यकाळ पूर्ण होत आला आहे. भाजपचे मागील तीन अध्यक्ष पाहता मराठा आणि ब्राह्मण समाजाला प्राधान्य देण्यात आल्याचे चित्र दिसले आहे.

या वेळी भाजपकडून शहराध्यक्ष देताना ‘ओबीसी’ चेहऱ्याचा प्राधान्याने विचार करण्यात येत आहे. त्याबाबत पक्षाच्या वरिष्ठ नेत्यांमध्ये चर्चाही झडली आहे. या चेहऱ्यांमध्ये आमदार योगेश टिळेकर, हेमंत रासने, माजी सभागृह नेते श्रीनाथ भिमाले, गणेश बीडकर यांच्या नावाची चर्चा आहे.भारतीय जनता पक्षाची पश्चिम महाराष्ट्राची संघटनात्मक बैठक मुंबईत पार पडली. या बैठकीनंतर झालेल्या औपचारिक चर्चेतही ‘ओबीसी’ चेहऱ्यांची चर्चा झाल्याचे समजते. याला आगामी महापालिका निवडणुकांच्या पार्श्वभूमीवर ‘ओबीसी’ चेहऱ्याला पक्षाची पसंती असल्याचा दावा सूत्रांकडून करण्यात आला आहे.मुंबई येथे पार पडलेल्या बैठकीस प्रदेशाध्यक्ष चंद्रशेखर बावनकुळे, राष्ट्रीय सह-संघटनमंत्री शिवप्रकाश आणि प्रदेश कार्याध्यक्ष रवींद्र चव्हाण, मंत्री चंदक्रांत पाटील, माधुरी मिसाळ, खासदार मेधा कुलकर्णी, आमदार विक्रांत पाटील, राजेश पांडे, शहराध्यक्ष धीरज घाटे, आमदार भीमराव तापकीर, आमदार हेमंत रासने, दिलीप कांबळे, जगदीश मुळीक आदी उपस्थित होते. विधानसभा निवडणुकीत पश्चिम महाराष्ट्रात भारतीय जनता पक्षाला मोठा जनाधार मिळाला;

तसेच प्राथमिक सदस्यत्व नोंदणीही मोठ्या संख्येने झाल्याबाबत या बैठकीत चर्चा करण्यात आली. पक्षाकडून मंडलाध्यक्ष निवडीवरही या वेळी चर्चा झाली.‘दीनानाथ मंगेशकर रुग्णालयाशी संबंधित तनिषा भिसे यांच्या दुर्दैवी मृत्यूनंतर आवश्यक माहिती न घेताच भारतीय जनता पक्षाच्या महिला मोर्चा सदस्यांनी उन्मादात केलेल्या वर्तनाबद्दल सर्वसामान्यांमध्ये मोठा रोष आहे. ही कृती पक्षाला निश्चितच शोभणारी नाही. त्यामुळे शहराध्यक्षांनी संबंधितांना समज द्यावी. यासोबत दिलगिरी व्यक्त करून नुकसानभरपाई दिल्यास पदाची व पक्षाची प्रतिष्ठा वाढेल,’ अशा शब्दात राज्यसभा खासदार प्रा. डॉ. मेधा कुलकर्णी यांनी भाजपला घराचा आहेर दिला होता. पक्षाच्या वर्धापनदिनाच्या कार्यक्रमात केंद्रीय राज्यमंत्री मुरलीधर मोहोळ; तसेच उच्च व तंत्रशिक्षण मंत्री चंद्रकांत पाटील यांनी कुलकर्णी यांच्या ‘आहेरा’ला प्रत्युत्तर दिले होते.या कार्यक्रमात या दोघांची भाषणे होण्यापूर्वीच कुलकर्णी तेथून निघून गेल्या होत्या. या पार्श्वभूमीवर पक्षाच्या मुंबईतील बैठकीत चर्चा झडेल, अशी शक्यता होती. मात्र, सर्व नेत्यांनी या बैठकीस उपस्थिती दर्शवत पक्ष वाढीसाठी आणाभाका घेतल्याचे चित्र उपस्थित नेत्यांना पाहावयास मिळाले. ‘त्या’ वक्तव्यावर बैठकीत चर्चा झाली नाही.