पत्नी कोमात, दोन्ही उच्चशिक्षित मुलं मुंबईत; नैराश्यातून निवृत्त मुख्याध्यापकाचा धक्कादायक निर्णय, घटनेनं खळबळ.

मुरलीधर जोशी हे पत्नी लता यांच्यासह उंबरखेड (जि. जळगाव) येथील एका शाळेत मुख्याध्यापक होते. निवृत्त झाल्यानंतर २०१७ मध्ये ते जेलरोड येथे राहण्यास आले होते.पत्नीची हत्या करून निवृत्त मुख्याध्यापकाने गळफास घेऊन आत्महत्या केल्याची धक्कादायक घटना जेलरोड येथे बुधवारी घडली. पत्नीही निवृत्त मुख्याध्यापिका होती. मुरलीधर रामचंद्र जोशी (वय ७८,रा. एकदंत अपार्टमेंट, जेलरोड) व लता जोशी (७६) अशी मृतांची नावे आहेत.ही घटना बुधवारी सायंकाळी साडेसहाच्या सुमारास घडली. आमच्या मृत्यूबद्दल कोणालाही दोषी ठरवू नये, असाही उल्लेख पत्रात नमूद केला आहे. पत्नीच्या आजारपणामुळे नैराश्य आल्याने तिचे जीवन संपविल्याची कबुली देणारी चिठ्ठी पोलिसांना त्यांच्या फ्लॅटमध्ये आढळली आहे.

जोशी दाम्पत्याची देखभाल करणाऱ्या महिलेच्या लक्षात हा प्रकार आल्यानंतर तिने तत्काळ पोलिसांना माहिती दिली. मुरलीधर जोशी हे पत्नी लता यांच्यासह उंबरखेड (जि. जळगाव) येथील एका शाळेत मुख्याध्यापक होते. निवृत्त झाल्यानंतर २०१७ मध्ये ते जेलरोड येथे राहण्यास आले होते. लता जोशी या आजाराने त्रस्त होत्या. ब्रेन हॅमरेजमुळे त्या दीड महिना कोमामध्ये होत्या. बऱ्या झाल्यानंतरही त्यांना अन्य व्याधी जडल्या होत्या.

पत्नीचे सततचे आजारपण व एकाकीपणाला कंटाळून मुरलीधर जोशी यांनी गळा आवळून तिची जीवनयात्रा संपवली, अशी माहिती उपनगर पोलिसांनी दिली. जोशी दाम्पत्याची दोन्ही मुले उच्चशिक्षित असून, मुंबईत उच्च पदावर नोकरीस आहेत. हे दाम्पत्य पंधरा दिवसांपूर्वीच मुंबईला त्यांच्या मुलांकडे राहून आले होते. विरंगुळा म्हणून दोघेही ज्येष्ठ नागरी संघाचे सभासदही झाले होते. पत्नीच्या उपचारांवर लाखो रुपये खर्च करूनही त्यांना आराम पडत नसल्याने हे टोकाचे पाऊल उचलण्यात आले असावे, अशी माहिती नातेवाइकांनी दिली.