ST कर्मचाऱ्यांना राज्य सरकारचा धक्का; मार्च महिन्याच्या पगारात कपात, किती पगार मिळणार.

 एसटीतील ८७ हजार कर्मचाऱ्यांना मार्च महिन्याचा निम्माच पगार एप्रिल महिन्यात जमा झाला आहे. महामंडळाकडे निधी नसल्याने निम्मा पगार कर्मचारी-अधिकाऱ्यांच्या खात्यात जमा करण्यात आला आहे.येत्या काही दिवसांत राज्य परिवहन (एसटी) महामंडळातील प्रवासी गर्दीचा हंगाम सुरू होणार आहे. या हंगामात प्रवासी वाहतुकीचा भार वाहणाऱ्या चालक-वाहकांना मात्र पगाराची चिंता सतावत आहे. एसटीतील ८७ हजार कर्मचाऱ्यांना मार्च महिन्याचा निम्माच पगार एप्रिल महिन्यात जमा झाला आहे. महामंडळाकडे निधी नसल्याने निम्मा पगार कर्मचारी-अधिकाऱ्यांच्या खात्यात जमा करण्यात आला आहे.एसटी महामंडळात झालेल्या संपानंतर राज्य सरकारने एसटी महामंडळातील कर्मचाऱ्यांच्या पगाराची जबाबदारी स्वीकारली होती. सद्यस्थितीत राज्य सरकारकडून एसटी प्रवासी प्रतिपूर्तीच्या रूपाने निधी महामंडळाला पुरवला जातो. एसटी कर्मचाऱ्यांचा पगार दर महिन्याच्या १० तारखेपर्यंत बँक खात्यात जमा होतो. एसटी कर्मचाऱ्यांच्या पगारासाठी ३५० ते ३६० कोटी रुपयांची आवश्यकता असते.

गेल्या दहा महिन्यांपासून एसटी कर्मचारी भविष्य निर्वाह निधी (पीएफ) जमा करण्यात आला नव्हता. यासाठी ४० कोटी रुपये वळते करण्यात आले होते. यामुळे एसटी कर्मचाऱ्यांचे निम्मा पगार खात्यात वर्ग करण्यात आला आहे. निधीच्या कमतरतेमुळे अप्रेंटिस अर्थात शिकाऊ कर्मचारी आणि निवृत्त अधिकारी यांचा पूर्ण पगार खात्यात महामंडळाने जमा केला आहे. एसटी कर्मचारी आणि सुरक्षा रक्षक यांच्या पगारापैकी अनुक्रमे ५६ टक्के आणि ५० टक्के रक्कम पगार म्हणून खात्यात जमा करण्यात आली आहे, असे महामंडळातील वरिष्ठ अधिकाऱ्यांनी स्पष्ट केले.‘एसटीतील ८० टक्के कर्मचाऱ्यांवर विविध कर्ज असून पगाराच्या अनियमिततेमुळे हप्त्यांवर परिणाम होतो. निम्या पगारात हप्ता, घरखर्च, शिक्षण खर्च कसा करायचा असे प्रश्न कर्मचाऱ्यांपुढे आहेत. ४० ते ४२ अंशांच्या तापमानात प्रवासी सेवा चालक-वाहकांकडून विनातक्रार देण्यात येते.

यामुळे सरकारने प्राधान्याने महामंडळाला निधी उपलब्ध करावा’, अशी मागणी एसटी कामगार संघटनेचे अध्यक्ष संदीप शिंदे यांनी केली आहे.परिवहनमंत्री प्रताप सरनाईक यांनी एसटी कर्मचाऱ्यांच्या पगाराचा प्रश्न तातडीने सोडवण्याच्या सूचना अपर मुख्य सचिवांना दिल्या आहेत. मार्च महिन्यातील पगारासाठी अपर मुख्य सचिवांच्या अध्यक्षतेखाली महामंडळाचे उपाध्यक्ष व व्यवस्थापकीय संचालकांची १५ एप्रिलला सकाळी ११.३० वाजता बैठक आयोजित करण्यात आली आहे.एसटी महामंडळाच्या इतिहासात पहिल्यांदाच वेतनाच्या ५६ टक्के पगार एसटी कर्मचाऱ्यांना देण्यात आला आहे. याला सरकार जबाबदार असून पगाराची जबाबदारी पूर्ण केली नाही’, अशी टीका एसटी कर्मचारी काँग्रेसचे सरचिटणीस श्रीरंग बरगे यांनी केली. अर्थसंकल्पीय अधिवेशनात एसटी कर्मचाऱ्यांच्या पगारातील अनियमितेबाबत एसटी महामंडळाचे वित्तीय सल्लागार आणि मुख्य लेखाधिकारी यांना तुरूंगात पाठवा, अशी मागणी विरोधकांनी केली होती.