साताऱ्यात तिहेरी अपघात, दोन जिगरी जागीच ठार, गावावर शोककळा.

वडूज-दहिवडी रस्त्यावर स्वामी समर्थ मंदिरा जवळ झालेल्या भीषण तिहेरी अपघातात औंध येथील दोन मित्रांचा जागीच मृत्यू झाला. शिवम शिंदे आणि प्रसाद सुतार अशी मृतांची नावे असून, त्यांच्या निधनाने औंधमध्ये शोक पसरला आहे. स्विफ्ट गाडीने ओम्नी आणि पिकअपला धडक दिल्याने हा अपघात झाला. अपघातात काही जण गंभीर जखमी झाले असून त्यांना रुग्णालयात दाखल करण्यात आले आहे.वडूज – दहिवडी रस्त्यावर स्वामी समर्थ मंदिरानजीक झालेल्या तिहेरी भीषण अपघातात औंध येथील दोन मित्र जागीच ठार झाले. शिवम शिंदे व प्रसाद सुतार अशी अपघातात ठार झालेल्या मित्रांची नावे आहेत. त्यांच्या अपघाती निधनाने औंध गावावर शोककाळा पसरली आहे. या अपघाताची नोंद वडूज पोलीस ठाण्यात झाली आहे. पोलीस निरीक्षक घनश्याम सोनवणे यांनी घटनास्थळी भेट दिली.याबाबत पोलिसांनी सांगितले की, सोमवारी रात्री साडेदहा वाजण्याच्या सुमारास दहिवडी- वडूज रस्त्यावर असणाऱ्या स्वामी समर्थ मंदिरानजीक स्विफ्ट गाडी (एचएच 03 डीए 7354) ही गाडी प्रसाद उर्फ बाबू राजेंद्र सुतार हा चालवत होता.

यावेळी त्याच्यासोबत शिवम हनुमंत शिंदे हा देखील गाडीत होता. प्रसाद सुतार यांने निष्काळजीपणाने भरधावपणे गाडी चालवून त्याच्या समोर असणाऱ्या ओमनीला (एचएच 14 डीएन 2758) पाठीमागून जोराची धडक दिली. त्यानंतर दहिवडीकडून वडूजला जाणाऱ्या पिकअप गाडीला (एचएच 11 सीएच 3342) समोरुन जोराची धडक दिल्याने मोठा भीषण अपघात झाला. या अपघातात शिवम शिंदे व प्रसाद सुतार हे दोघे जागीच ठार झाले, तर स्विफ्टमध्ये असणारे मनोज शंकर रणदिवे, सत्यम राजेंद्र खौरमोडे (दोन्ही रा. औंध) तसेच पिकअप गाडीमधील लालासाहेब परशुराम पाटोळे, ज्योती लालासाहेब पाटोळे (दोन्ही रा. दरुज) ओमनी गाडीमधील रोहन आप्पासाहेब भिसे व आकाश सोनबा बर्गे (रा. वडूज) हे गंभीर जखमी झाले आहेत.या तिहेरी भीषण अपघाताची माहिती मिळताच वडूज पोलीस ठाण्याचे पोलीस निरीक्षक घनश्याम सोनवणे यांनी पोलीस कर्मचाऱ्यांसह अपघातस्थळी भेट देऊन जखमींना उपचाराला जिल्हा रुग्णालयात पाठवले.

त्यानंतर पोलिसांनी वाहतूक सुरळीत करण्यासाठी प्रयत्न केले. या अपघाताची नोंद वडूज पोलीस ठाण्यात झाली आहे. धनाजी आबाजी सुळे (रा. पिंपळवाडी, ता. खटाव) यांनी फिर्याद दिली आहे.या अपघातातील मृत शिवम शिंदे हा औंध शिक्षण मंडळाचे विश्वस्त हणमंतराव शिंदे यांचा मुलगा आहे, तर प्रसाद सुतार हा औंध शिक्षण मंडळाचे कर्मचारी राजेंद्र सुतार यांचा मुलगा आहे. दोघेही मित्र होते. त्यांच्या अपघाती निधनाने औंध गावावर शोककळा पसरली असून आजचा आठवडी बाजार रद्द करण्यात आला आहे.