पाच कोटींचं खंडणी प्रकरण, शरद पवार गटाचे अजित पवार पोलिसांच्या ताब्यात.

शरद पवार पक्षाचे अजित पवार यांना पोलिसांनी ताब्यात घेतलं आहे. ग्रामविकास मंत्री जयकुमार गोरे यांनी तुषार खरात विरोधात केलेल्या ५ कोटींच्या खंडणीप्रकरणात पोलिसांनी दहिवडीच्या अजित पवारांना ताब्यात घेतलं आहे. ग्रामविकास मंत्री जयकुमार गोरे यांनी काही दिवसांपूर्वी दहिवडी पोलीस ठाण्यात पत्रकार तुषार खरात यांच्याविरोधात पाच कोटी रुपयांच्या खंडणीची तक्रार दाखल केली होती. त्याच प्रकरणात राष्ट्रवादी शरद पवार गटाच्या अजित पवार यांना दहिवडी पोलिसांनी ताब्यात घेतले आहे. राष्ट्रवादी शरद पवार गटाचे नेते प्रभाकर देशमुख यांचे खंदे समर्थक म्हणून ओळख असलेल्या अजित पवार यांना सातारा येथील दहिवडी पोलिसांनी प्रकरणात ताब्यात घेतले आहे. त्यामुळे माण तालुक्यात राजकीय, सामाजिक वर्तुळात चांगलीच खळबळ उडाली आहे.याबाबत पोलिसांनी सांगितले, की राज्याचे ग्रामविकास मंत्री जयकुमार गोरे यांच्या तक्रारीनुसार खंडणी प्रकरणात तुषार खरात यांना दहिवडी पोलिसांनी मुंबईमधून ताब्यात घेतले होते.

ज्या महिलेच्या अनुषंगाने जयकुमार गोरे यांच्यावर आरोप केले गेले, त्या महिलेलादेखील सातारा पोलिसांनी एक कोटी रुपयांची खंडणी घेताना रंगेहात पकडले होते. यानंतर उपमुख्यमंत्री एकनाथ शिंदे यांच्या शिवसेनेचे जिल्हा उपाध्यक्ष अनिल सुभेदार यांनाही पोलिसांनी ताब्यात घेऊन अटक केली होती.यानंतर महाराष्ट्रातील अनेक मातब्बर नेत्यांनी या प्रकरणावर भाष्य केले होते. त्यानंतर दस्तुरखुद्द मुख्यमंत्री देवेंद्र फडणवीस यांनीही हा मुद्दा अर्थसंकल्प अधिवेशन सुरू असताना विधानसभेत मांडून या प्रकरणाची चौकशी केली जाईल, असे म्हटले होते.खंडणी प्रकरणात दहिवडी पोलिसांनी ताब्यात घेतलेले अजित पवार हे दहिवडी कॉलेज दहिवडीच्या महाविद्यालयीन विकास समितीचे सदस्य आहेत. पाणी फाउंडेशनमध्ये देखील अजित पवार यांनी काम केले आहे. मात्र, अजित पवार हे खंडणी प्रकरणात सहभागी असतील असे आजपर्यंत कुणालाही शंका वाटली नाही. दहिवडी पोलिसांनी खंडणी प्रकरणातील संशयित आरोपींच्या संभाषणाची कॉल डिटेल्स सीडीआर प्रणालीद्वारे मिळवून आजपर्यंत या प्रकरणात सहभागी असलेल्या प्रत्येकाला ताब्यात घेऊन अटक केली आहे. याच प्रकरणाच्या अनुषंगाने अजित पवार यांच्याबाबत असलेल्या संशयावरून दहिवडी पोलिसांनी सध्या त्यांना चौकशीसाठी ताब्यात घेतले असल्याची माहिती मिळत आहे.