सेना, भाजपमध्ये वर्चस्वाची लढाई, पण फटका आव्हाडांना; शिंदेंच्या होम ग्राऊंडवरील संघर्ष विचित्र वळणावर.

उपमुख्यमंत्री एकनाथ शिंदे यांचा बालेकिल्ला असलेल्या ठाण्यात त्यांच्या वर्चस्वाला शह देण्याची तयारी भाजपनं सुरु केली आहे. त्यासाठी भाजप नेते आणि वनमंत्री गणेश नाईक आधीच सक्रिय झाले आहेत.उपमुख्यमंत्री एकनाथ शिंदे यांचा बालेकिल्ला असलेल्या ठाण्यात त्यांच्या वर्चस्वाला शह देण्याची तयारी भाजपनं सुरु केली आहे. त्यासाठी भाजप नेते आणि वनमंत्री गणेश नाईक आधीच सक्रिय झाले आहेत. नाईकांचं वर्चस्व असलेल्या नवी मुंबईतील बालेकिल्ल्यात उद्धव ठाकरेंच्या पक्षातील प्रभावी माजी नगरसेवकांना आपल्याकडे खेचण्यासाठी शिंदेसेनेचे प्रयत्न सुरु आहेत. तर दुसरीकडे ठाणे महापालिका हद्दीत आपली ताकद वाढवण्यासाठी भाजपनं राष्ट्रवादी काँग्रेस शपचे आमदार जितेंद्र आव्हाड यांच्या समर्थक नगरसेवकांना गळाला लावण्याची खेळी भाजपनं सुरु केली आहे. महापालिका निवडणुकीत युती न झाल्यास शिंदेंसमोर अधिकाधिक तगडं आव्हान निर्माण करण्याची व्यूहनीती भाजपनं आखली आहे. त्यामुळे भाजप विरुद्ध शिंदेसेना संघर्षाचा फटका नवी मुंबईत ठाकरेंना आणि ठाण्यात, विशेषत: कळव्यात आव्हाडांना बसणार आहे.

आमदार जितेंद्र आव्हाडांचं कळवा, विटावा, मुंब्रा भागात चांगलं प्राबल्य आहे. दिव्याच्या शेजारी असलेल्या भागातही आव्हाड यांना मानणारा मोठा वर्ग आहे. महापालिका निवडणुकांमध्ये आव्हाडांचं प्राबल्य कायम दिसून आलं आहे. ठाणे महापालिका हद्दीतील ३९ नगरसेवक कळवा-मुंब्रा भागातून निवडून येतात. ठाणे महापालिकेत एकूण १३१ प्रभाग आहेत. २०१७ मध्ये झालेल्या निवडणुकीत एकसंध शिवसेनेनं ६७, एकसंध राष्ट्रवादीनं ३४ जागा जिंकल्या होत्या. तर भाजपनं २३ जागांवर मजल मारली होती. आता आव्हाड समर्थक माजी नगरसेवकांना आपल्या बाजूला खेचण्याचे प्रयत्न भाजपनं सुरु केले आहेत.ठाणे शहर, कोपरी पाचपाखाडी आणि ओवळा माजीवडा विधानसभा मतदारसंघांमध्ये शिंदेंची प्रचंड ताकद आहे. तर जुन्या ठाण्यात भाजपचं प्राबल्य आहे.

त्या तुलनेत या ३ विधानसभा क्षेत्रांमध्ये राष्ट्रवादी काँग्रेसची ताकद अतिशय कमी आहे. ठाणे महापालिका निवडणुकीत शिंदेसेनेसमोर आव्हान उभं करायचं असल्यास किंवा युती झाल्यास अधिकाधिक जागा पदरात पाडून घ्यायच्या असल्यास ताकद वाढवण्याखेरीज त्यांच्यासमोर अन्य पर्याय नाही. त्यामुळे स्थानिक नेत्यांना आपल्या गळाला लावण्याचे प्रयत्न भाजप नेत्यांनी सुरु केले आहेत.वागळे इस्टेटसह शेजारच्या परिसरात शिंदे यांची ताकद आहे. या भागातील विरोधकांनीही त्यांच्यापुढे शरणागती पत्करल्याची स्थिती आहे. त्यामुळे इथे ताकद वाढवणं भाजपसाठी कठीण आहे. वागळे इस्टेटला पर्याय म्हणून भाजपनं आव्हाडांचं वर्चस्व असलेल्या कळवा भागात विशेष काम सुरु केलं आहे. कळवा-मुंब्रामध्ये भाजपची अवस्था अगदीच बिकट आहे. हा मतदारसंघ डॉ. श्रीकांत शिंदे यांच्या लोकसभा मतदारसंघाचा भाग आहे. त्यामुळे या भागातील बहुतांश माजी नगरसेवकांना आपल्या पक्षात खेचण्याचा त्यांचा प्रयत्न आहे. ही घडामोड सुरु असताना भाजपनंदेखील या भागातील आव्हाड समर्थक नगरसेवकांवर लक्ष केंद्रीत केलं आहे.कळव्यातील शरद पवारांच्या पक्षाच्या १८ आजी-माजी नगरसेवकांना गळ घालण्यास सुरुवात केली आहे. यातील काही जणांच्या भाजपच्या राज्यातील वरिष्ठ नेत्यांसोबत बैठका झाल्याची माहिती आहे. सत्ता नसल्यानं आव्हाड यांचे बहुसंख्य नगरसेवकही अस्वस्थ आहेत. प्रभागातील कामांसाठी निधी मिळत नाही, स्थानिक कामं मार्गी लावताना प्रशासकीय अधिकारी फारसं ऐकत नाही, अशी अनेकांची स्थिती आहे. त्यामुळे सत्ताधारी पक्षात जाण्याच्या विचारात अनेक जण आहेत. अशा माजी नगरसेवकांना गळाला लावण्याचा प्रयत्न भाजप आणि शिंदेसेनेकडून सुरु आहे.