घरी रिटायरमेंटची तयारी सुरु, तिकडे शेवटची ड्युटी करताना लोको पायलटचा अंत; सुन्न करणारी घटना.

निवृत्तीच्या दिवशी अखरेच्या कामाला निघाले, मात्र ते काम त्याच्या आयुष्यातील अखेरचं काम ठरलं. निवृत्तीच्या दिवशी रेल्वे अपघातात एका लोको पायलटचा मृत्यू झाला.दोन मालगाड्यांची भीषण धडक होऊन मोठा अपघात घडला होता. झारखंडच्या साहिबगंज जिल्ह्याच्या अंतर्गत येणाऱ्या बरहेट पोलीस स्टेशन हद्दीतील भोगनाडीह NTPC फाटकाजवळ दोन मालगाड्यांची धडक होऊन भयंकर अपघात घडला. या अपघातात मालगाडीच्या इंजिनमध्ये आग लागली. या आगीच्या भक्ष्यस्थानी पडून रेल्वेच्या दोन लोको पायलटचा हादरवणारा मृत्यू झाला होता. यापैकी एक लोको पायलट पश्चिम बंगालचे असून गंगेश्वर मल असं त्यांचं नाव होतं. तर दुसरे झारखंडच्या बोकारो येथील राहणारे असून त्यांचं नाव अंबुज महतो असल्याची माहिती आहे.

या दुर्घटनेत मृत्यूमुखी पडलेले गंगेश्वर मल हे त्याच दिवशी निवृत्त होणार होते. ते त्यांच्या अखेरच्या सेवा यात्रावर मालगाडी घेऊन निघाले होते. ते पश्चिम बंगालच्या मुर्शिदाबाद जियागंज येथील राहणारे होते. या मालगाडी अपघातात त्यांचा मृत्यू झाला. ड्युटीच्या अखेरच्या दिवशी लोको पायलटचा रेल्वे अपघातात मृत्यू झाल्याचं ऐकून सारेच हळहळले आहेत.१ एप्रिलला लोको पायलट गंगेश्वर मल हे निवृत्त होणार होते. निवृत्तीच्या दिवशी ते ललमटिया येथून कोळसा लोड करुन पश्चिम बंगालच्या फरक्का NTPC मालगाडी घेऊन जात होते. यादरम्यान, झारखंडच्या साहिबगंज जिल्ह्या अंतर्गत येणाऱ्या बरहटच्या सोनाजोडी येथील लूप लाइनवर एक मालगाडी आधीपासून उभी होती. त्याच रुळावर दुसरी मालगाडी आली दोघोंनी जोरदार धडक झाली.धडक होताच मालगाडीच्या इंजिनला आग लागली. या आगीच्या विळख्यात अडकून दोन्ही लोको पायलटचा मृत्यू झाला. या घटनेत आणखी पाचजण जखमी झाले आहेत. लोको पायलट गंगेश्वर मल यांचं कुटुंब त्यांच्या निवृत्तीच्या कार्यक्रमाची तयारी करत होते. ते गंगेश्वर यांच्यासाठी सरप्राइज प्लॅन करत होते. मात्र, तेवढ्यात त्यांना गंगेश्वर यांच्या मृत्यूची माहिती मिळाली आणि त्यांच्या पायाखालची जमीनच सरकली. या घटनेने त्यांच्या कुटुंबाला मोठा धक्का बसला आहे. तर, निवृत्तीच्याच दिवशी लोको पायलटचा अशा प्रकारे रेल्वे अपघातात मृत्यू झाल्याने रेल्वे कर्मचाराही शोकाकुल झाले आहे.