आज ‘वक्फ’कल्लोळ; वादग्रस्त विधेयक लोकसभेत मांडले जाणार, प्रचंड गोंधळाचे संकेत.

वादग्रस्त वक्फ मंडळ दुरुस्ती विधेयक आज, बुधवारी (दि. ३) प्रश्नोत्तराच्या तासानंतर दुपारी १२ वाजता लोकसभेत मांडले जाणार यावर मंगळवारी शिक्कामोर्तब झाले.वादग्रस्त वक्फ मंडळ दुरुस्ती विधेयक आज, बुधवारी (दि. ३) प्रश्नोत्तराच्या तासानंतर दुपारी १२ वाजता लोकसभेत मांडले जाणार यावर मंगळवारी शिक्कामोर्तब झाले. या मुद्यावरून सभागृहात मंगळवारी प्रचंड गोंधळ झाल्याने शून्य प्रहराचे कामकाज ठप्प पडले.लोकसभेच्या कामकाज सल्लागार समितीच्या बैठकीत (बीएसी) हे विधेयक सभागृहात मांडण्याचा निर्णय घेण्यात आला. शिवसेना उबाठाचे अरविंद सावंत यांच्यासह समितीतील विरोधी पक्षीय सदस्यांनी यावेळी तीव्र विरोध केला. याचे पडसाद नंतर सभागृहातही शून्य काळात उमटले. वक्फ सादरीकरणाच्या विरोधात घोषणाबाजी करणाऱ्यांना लोकसभाध्यक्ष ओम बिर्ला यांनी वारंवार शांततेचे आवाहन केले व नंतर दुपारी दोनपर्यंत कामकाज तहकूब केल्याची घोषणा केली. केंद्रीय अल्पसंख्याकमंत्री किरण रिजिजू उद्या लोकसभेत हे विधेयक मांडतील.

त्यावर दुपारी १२ पासून किमान ८ तास चर्चा होईल असे बिर्ला यांनी सांगितले. मात्र विरोधकांनी यावर १२ तासांची चर्चा करण्याची मागणी केली आहे. दरम्यान, राष्ट्रवादी काँग्रेस शरदचंद्र पवार पक्षाच्या भूमिकेबाबत उत्सुकता आहे.‘बीएसी’च्या बैठकीत मी समितीसमोर प्रस्ताव मांडला होता की उद्या २ एप्रिल रोजी आपण वक्फ दुरुस्ती विधेयक आणत आहोत आणि त्यासाठी आपल्याला चर्चेसाठी वेळ द्यावा लागेल. या विधेयकावर चर्चेसाठी एकूण आठ तासांचा वेळ दिला जाईल यावर एकमत झाले. हा वेळ सभागृहाचे मत घेतल्यानंतर वाढवता येईल, असे रिजिजू यांनी सांगितले. ‘हे विधेयक गरीब मुस्लिम, मुले आणि महिलांच्या हिताचे आहे. वक्फ मालमत्तांचे व्यवस्थापन पारदर्शक पद्धतीने केले पाहिजे. या विधेयकाला विरोध करणारे काही मूठभर शक्तिशाली लोक आहेत.

त्यांनी वक्फ मालमत्तांवर अतिक्रमण केले आहे, असे ते म्हणाले‘बीएसी’च्या बैठकीत सरकारने आपल्याला बोलू दिले नाही असा आरोप करीत विरोधी पक्षांच्या सदस्यांनी बैठकीतून सभात्याग केला. बाहेर आल्यानंतर त्यांनी आक्रमकपणे बाजू मांडली.‘वक्फ मंडळांच्या रचनेत सुधारणा करणे ही काळाची गरज आहे असे सांगताना या वक्फ ने मुस्लिमांसाठी काय चांगले केले,’ असा प्रश्न उत्तर प्रदेशचे मुख्यमंत्री योगी आदित्यनाथ यांनी उपस्थित केला. ‘प्रत्येक चांगल्या कामाला विरोध होतो. वक्फने मुस्लिमांचे काही कल्याण केले आहे का, ही मंडळे केवळ काही लोकांच्या वैयक्तिक स्वार्थाचे केंद्र व कोणत्याही सरकारी मालमत्तेवर जबरदस्तीने कब्जा करण्याचे माध्यम झाली आहेत,’ असे ते म्हणाले.इंडिया आघाडीतील काँग्रेससह अन्य पक्षांनी मंगळवारी संध्याकाळी दीड तास बैठक घेऊन उद्याच्या वक्फ विधेयक विरोधी रणनीतीची आखणी केली. भारतीय जनता पक्षासह अनेक पक्षांनी उद्यासाठी आपल्या खासदारांसाठी तीन ओळींचा पक्षादेश (व्हिप) प्रसृत केला. वक्फ दुरुस्ती विधेयकाला बुधवारी संसदेची प्रत्यक्ष मंजुरी मिळतेवेळी शिवसेना उबाठा पक्षाची लोकसभा व राज्यसभेतील भूमिका काय असेल, याबाबतही उत्सुकता आहे. राष्ट्रवादी काँग्रेस (शरद पवार) यांच्या भूमिकेविषयी उत्सुकता आहे. संसदेच्या समन्वय सभागृहात झालेल्या या बैठकीला राहुल गांधी व मल्लिकार्जुन खर्गे, शिवसेना उबाठाचे जेपीसी सदस्य अरविंद सावंत, राष्ट्रवादीच्या (श.प.) सुप्रिया सुळे यांच्यासह सप, द्रमुक, तृणमूल काँग्रेस, समाजवादी पक्ष आदी पक्षांचे नेते उपस्थित होते. विरोधकांकडे लोकसभेत किमान २३५ खासदारांचे बळ असल्याचे सांगण्यात येते.