विरणाऱ्या किंकाळ्या, ढिगाऱ्यांखालून वाढती दुर्गंधी; म्यानमारमध्ये भूकंपानंतर भयंकर परिस्थिती.

गेल्या आठवड्यात म्यानमार, बांगलादेश, थायलंडला भूकंपाचे धक्के बसले. भूकंपाचा केंद्रबिंदू म्यानमारमध्ये असल्यानं सर्वाधिक नुकसान याच देशात झालं. २८ मार्चला झालेल्या भूकंपातील मृतांचा आकडा २ हजारांच्या पुढे गेला आहे.नेप्यिडॉ: गेल्या आठवड्यात म्यानमार, बांगलादेश, थायलंडला भूकंपाचे धक्के बसले. भूकंपाचा केंद्रबिंदू म्यानमारमध्ये असल्यानं सर्वाधिक नुकसान याच देशात झालं. २८ मार्चला झालेल्या भूकंपातील मृतांचा आकडा २ हजारांच्या पुढे गेला आहे. तर ३,९०० हून अधिक जण जखमी आहेत. बेपत्ता लोकांची संख्या २७० इतकी आहे. सरकारकडून ही आकडेवारी सोमवारी देण्यात आली.जसजसे तास उलटत चालले आहेत, तसतशी ढिगाऱ्याखाली अडकलेल्या लोकांची जिवंत असण्याची शक्यता मावळत चालली आहे. आधी किंकाळ्यांचे आवाज येत होते. पण आता त्या किंकाळ्यांचे आवाज क्षीण होत होत विरुन गेले आहेत. म्यानमारच्या दुसऱ्या मोठ्या शहरातील परिस्थिती अतिशय विदारक आहे. शहरात सगळीकडे कोसळलेल्या इमारती, घरांचे ढिग आहेत. ढिगाऱ्याखालून येणारी दुर्गंधी वाढू लागली आहे. त्यामुळे मृतांचा आकडा वाढण्याची भीती आहे.म्यानमारमध्ये २८ मार्चला ७.७ रिश्टर स्केलचा भूकंप झाला. या भूकंपाचा मोठा फटका मंडालय शहराला बसला.

अनेक ठिकाणचे ढिगारे अद्याप उपसण्यात आलेले नाहीत. ढिगाऱ्यांखाली अडकलेल्या लोकांसाठी त्यांचे नातेवाईक रडत आहेत. ढिगाऱ्यांखाली तीव्र दुर्गंधी येत असल्यानं अनेक जण हतबल झाले आहेत. आपले कुटुंबीय, नातेवाईक कायमचे निघून गेल्याचा त्यांचा समज पक्का होऊ लागला आहे. संपूर्ण शहर जणू दफनभूमी बनलं आहे.विनाशकारी भूकंपानं म्यानमारमधील सगळी यंत्रणा मोडून पडली आहे. ‘भूकंपाची घटना एखाद्या वाईट स्वप्नासारखी होती. सगळीकडे मृतदेह आहेत. आम्हाला ढिगाऱ्यांखालून लोकांचे आवाज ऐकू येत आहेत. पण त्यांना प्रतिसाद देताना आम्हीच कमी पडत आहोत.

आमची संख्या कमी आहे. मदतीचे हात कमी पडत आहेत. अडकलेल्यांपर्यंत वेळेवर पोहोचताना आमची तारेवरची कसरत सुरु आहे,’ अशा शब्दांत क्याव मिन यांनी त्यांची हतबलता व्यक्त केली. स्वयंसेवक म्हणून काम करणारे मिन गेल्या अनेक तासांपासून ढिगाऱ्यांमध्ये जाऊन तो उपसण्याचं काम करत आहेत.शुक्रवारी झालेल्या भूकंपानं देशातील महत्त्वाची शहरं पूर्णपणे उद्ध्वस्त केली. अनेक इमारती कोसळल्या आहेत. बऱ्याच ठिकाणी रस्त्यांना तडे गेले आहेत. त्यामुळे रस्ते मार्गानं मदत मिळण्याची शक्यता कमी आहे. राजधानी नेप्यिडॉच्या विमानतळाचा कंट्रोल टॉवर कोसळला आहे. त्यामुळे बाहेरुन मदत मिळवताना अडथळे येतात. आधीच देशात यादवी माजलेली असताना भूकंपानं म्यानमारचं अक्षरश: कंबरडं मोडलं आहे.