Rajendra Nikam
नागपूरात पोलिसांनी एका कुख्यात चोराला अटक केली आहे. ज्याच्याकडून तब्बल ७ दुचाकीसह इतर वाहने जप्त केली आहेत. रुग्णांचा नातेवाईक असल्याचे भासवून गाडी गायब करण्यास त्याने सुरु केली होती. त्याला पोलिसांनी सापळा रचत अटक केली.व्यसन भागविण्यासाठी मेडिकल कॉलेज हॉस्पिटल परिसरातून दुचाकी वाहने चोरी करणाऱ्या कुख्यात चोरट्याला अजनी पोलिसांनी सिनेस्टाइल सापळा रचून अटक केली. श्रीयांश ऊर्फ वैभव गंगाधर वरुडकर वय ४१ रा. रामकृष्णनगर,दिघोरी,असे अटकेतील चोरट्याचे नाव आहे. श्रीयांश याला दारूचे व्यसन आहे. ते भागविण्यासाठी तो वाहनचोरी करायचा.
श्रीयांश हा रुग्णाचे नातेवाइक असल्याचे भासवून परिसरातील विश्रामगृहात थांबून रात्री रुग्णाच्या नातेवाइकांसोबतच जेवायचा. संधी साधून वाहन चोरी करीत होता. एका आठवड्यात मेडिकलमधून दोन वाहने चोरी गेली. याप्रकरणी अजनी पोलिसांनी चोरीचा गुन्हा दाखल केला. वरिष्ठ पोलिस निरीक्षक नितीनचंद्र राजकुमार यांच्या मार्गदर्शनाखाली निरीक्षक लक्ष्मण केंद्रे, उपनिरीक्षक सिद्धांत मस्के, हेडकॉन्स्टेबल ओमकार बाराभाई, नितीन सोमकुवर, अश्विन सहारे, नरेश श्रावणकर, मनीष भलमे, कुणाल उके व हिमांशू पाटील यांनी परिसरातील सीसीटीव्हींची पाहणी केली. दोन्ही वाहने श्रीयांशने चोरी केल्याचे समोर आले.पोलिसांनी चौकशी केली असता तो विश्रामगृहात रुग्णाचा नातेवाइक असल्याचे भासवून थांबत असल्याचेही तपासात समोर आले. पोलिसांनी विश्रामगृहात सापळा रचला.
