दूध तापवताना गॅसगळती, कामाच्या पहिल्याच दिवशी पुण्यात २४ वर्षीय तरुणाचा होरपळून मृत्यू.

 संतोषचा रविवारी कामाचा पहिला दिवस होता. कामाच्या पहिल्याच दिवशी घडलेल्या या घटनेमुळे परिसरात शोककळा पसरली होती.हॉटेलमध्ये दूध तापविताना सिलिंडरमधून गॅसगळती झाल्याने आग लागून संतोष हेगडे (वय २४) या कामगाराचा होरपळून मृत्यू झाला. ही घटना धनकवडीतील के. के. मार्केटजवळ रविवारी घडली. संतोषचा रविवारी कामाचा पहिला दिवस होता. कामाच्या पहिल्याच दिवशी घडलेल्या या घटनेमुळे परिसरात शोककळा पसरली होती.धनकवडीतील के. के. मार्केटजवळील साईबा हॉटेलमध्ये ही दुर्घटना घडली. दुपारी सव्वा चारच्या सुमारास हॉटेलला आग लागल्याची माहिती अग्निशमन दलाला मिळाली. कात्रज व गंगाधाम अग्निशमन केंद्रांची वाहने तातडीने घटनास्थळी रवाना करण्यात आली. जवानांनी आग शमविण्यासाठी पाण्याचा मारा सुरू केला; तसेच आत अडकलेल्या कामगारांना जवानांनी जखमी अवस्थेत बाहेर काढून तातडीने उपचाराकरिता रुग्णालयात दाखल केले. मात्र, अरुंद जागेमुळे संतोषला हॉटेलबाहेर पडता आले नाही. त्यामुळे गुदमरून त्याचा मृत्यू झाला. कामावरच्या पहिल्याच दिवशी संतोषबाबतीत घडलेल्या या घटनेने सहकाऱ्यांना धक्का बसला.दरम्यान, जवानांनी शर्थीचे प्रयत्न करून आग आटोक्यात आणली.

आगीमुळे हॉटेलमधील सर्व साहित्य जळाले असून, शेजारी असलेल्या दोन दुकानांनाही मोठी झळ बसली आहे. दूध तापवत असताना सिलिंडरमधून गॅसगळती झाल्यामुळे आग भडकली. त्याचवेळी हॉटेलमध्ये एकूण आठपैकी तीन सिलिंडरमधून मोठ्या प्रमाणात गॅसगळती झाल्याचे प्राथमिक पाहणीत निष्पन्न झाले आहे. अग्निशमन केंद्राचे अधिकारी सुनील नाईकनवरे, रामदास शिंदे, भरत वाडकर आदींनी इतर कामगारांचा जीव वाचविला.रस्ता ओलांडताना डंपरने जोरदार धडक दिल्याने झालेल्या अपघातात ज्येष्ठ महिलेचा गंभीर जखमी होऊन मत्यू झाल्याचा प्रकार समोर आला आहे.

ही घटना पुणे-सातारा महामार्गावर वरवे खुर्द गावच्या हद्दीत ‘हॉटेल अंगण’ समोर शनिवारी घडली. शकुंतला विलासराव पाटील (वय ७३, रा. पेठकर कॉलनी, फलटण, जि. सातारा) असे अपघातात मृत्यू झालेल्याचे नाव आहे. या प्रकरणी राजगड पोलिस ठाण्यात अज्ञातावर गुन्हा दाखल झाला आहे.याबाबत मनोज विलासराव पाटील यांनी फिर्याद दिली. पोलिसांनी दिलेल्या माहितीनुसार, शनिवारी शकुंतला पाटील रस्ता ओलांडून जात होत्या. दरम्यान, पुण्यावरून साताऱ्याच्या दिशेने जाणाऱ्या एका भरधाव डंपरने शकुंतला यांना जोरदार धडक दिली. त्यामुळे गंभीर जखमी होऊन त्यांचा मृत्यू झाला. अपघात झाल्यानंतर चालक तिथे न थांबता डंपर घेऊन पसार झाला. मात्र, पोलिसांना वाहनाचा नंबर मिळाला आहे. या प्रकरणी राजगड पोलिस पुढील तपास करीत आहेत.