इतरांना मदत करणारा ‘आपदा मित्र’ म्हणून लोकप्रिय, बसच्या चाकाखाली आला आणि आक्रीत घडलं.

मुंबई-गोवा महामार्गावर बसच्या चाकाखाली येत तरुणाचा दुर्दैवी मृत्यू झाल्याची घटना समोर आली आहे. या घटनेने कुटुंबावर दु:खाचा डोंगर कोसळला आहे. मुंबई – गोवा महामार्गावर आजवर अनेकदा अपघात घडले आहेत. अनेकांचे संसार याच महामार्गावरील झालेल्या अपघातामुळे उध्वस्त झाले आहेत. मुंबई – गोवा हायवेवर सतत अपघाताच्या घटना घडत आहेत. अपूर्ण असलेला हा महामार्ग अनेकांचे संसार उध्दवस्त करणारा मृत्यूचा सापळा बनला आहे. याच महामार्गावर पुन्हा एकदा भीषण अपघात झाला आहे. या महामार्गावर जुने माणगाव येथील तीन बत्ती नाका येथे २० मार्च रोजी सकाळी ११.१५ वाजण्याच्या दरम्यान प्राणांतिक अपघात घडला आहे.महाड बाजूकडून मुंबईकडे जाणारा कंटेनर क्र. RJ १९ GG ०५७० याने भरधाव वेगात येत मागच्या टायरखाली एका दुचाकीस्वाराला चिरडले. या दुर्दैवी अपघातात माणगाव येथे राहणारा रफीक जामदार (वय वर्षे ३९) याचा मृत्यू झाला आहे.

रफिक आपली हिरो होंडा पॅशन प्लस क्रं एम एच ०६ वाय ४४८२ घेऊन जात असताना तीन बत्ती नाका येथे कंटेनरच्या मागील टायरखाली येऊन चिरडला गेला आणि रफिक जामदार याचा या अपघातात दुर्दैवी मृत्यू झाला आहे.रफिक जामदार हा व्यवसायाने इलेक्ट्रिशन, प्लबिंग, एसी-फ्रीज मेकॅनिक म्हणून कार्यरत होता. तसंच रफिक जामदार हा ‘आपदा मित्र’ म्हणून माणगांवमधील साळुंखे रेस्क्यू टीममध्येही कार्यरत होता. रफिक हा अजातशत्रू म्हणून परिसरात परिचित होता. अनेकांच्या अडचणींना तो स्वतःहून धावून जात असे.

मात्र रेस्क्यू टीममधून आपल्या प्राणांची बाजी लावून अनेकांचे प्राण वाचवणारा रफिकचा अपघाती दुर्दैवी मृत्यू झाल्याने परिसरात शोककळा पसरली आहे. रफिकच्या पश्चात पत्नी आणि दोन मुली असा परिवार आहे.दरम्यान, माणगावमध्ये सततची वाहतूक कोंडी, वाहतूक नियोजनाचा अभाव यामुळे हा अपघात होऊन रफिकचा जीव गेल्याचा आरोप करत संतप्त जमावाने आक्रमक भूमिका घेत रस्ता रोको करण्याचा प्रयत्न केला. यावेळी स्थानिक ग्रामस्थ आणि रफिकचे नातेवाईक रस्त्यावर उतरले होते. मात्र घटनास्थळी माणगाव पोलीस ठाणे टीम, माणगाव वाहतूक पोलीस शाखा, महामार्ग पोलीस यांच्या मदतीने प्रकरण शांत करून वाहतूक सुरळीत करण्यात आली.