झाडाझुडपात पडलेल्या पिशवीत महिलेचं डोकं, धड वेगळं; विरारमधील घटनेचं गूढ उकललं.

 विरारमध्ये एका पिशवीत महिलेचं डोकं आढळलं होतं. पोलिसांनी तात्काळ याचा तपास केल्यानंतर घटनेचं गूढ उकललं आहे. याप्रकरणी पोलिसांनी एकाला अटक केली आहे.विरार येथील शिरवली नजीक एका महिलेचे मुंडके आढळून आले होते. कौटुंबिक वादातून पतीने आपल्या पत्नीची हत्या करून मृतदेहाची विल्हेवाट लावण्यासाठी तिचे शीर आणि धड कापून फेकून दिले होते. या प्रकरणाचा छडा गुन्हे शाखा तीनच्या पथकाने लावला असून आरोपीला अटक करण्यात आली आहे. हरिश हिप्परगी (वय ४९) असे अटक करण्यात आलेल्या आरोपी पतीचे नाव आहे.गुरुवारी सायंकाळच्या सुमारास मांडवी परिसरातील काही तरुण या ठिकाणी आडोशाला लघुशंखेसाठी गेले होते. त्यावेळी त्यांना एक पिशवी दिसली. त्या पिशवीमध्ये महिलेचे मुंडके होते. या घटनेमुळे परिसरात एकच खळबळ उडाली. घटनेची माहिती मिळाल्यानंतर मांडवी पोलीस घटनास्थळी दाखल झाले आणि या प्रकरणाचा तपास सुरू करण्यात आला. मीरा-भाईंदर, वसई, विरार, पुणे शाखा कक्ष तीनच्या पोलिसांनी या प्रकरणाचा तपास केला असता धक्कादायक माहिती उघडकीस आली आहे.

हरिश हिप्परगी हा त्याची पत्नी उत्पला हिप्परगी (वय ५१) आणि मुलासोबत नालासोपारा येथील रेहमत नगर परिसरात वास्तव्यास आहे. पत्नी उत्पला हिला पहिल्या पतीपासून एक मुलगा होता. दोघा पती-पत्नीमध्ये मुलावरून कौटुंबिक वाद होता. ८ जानेवारी रोजी दोघांमध्ये वाद झाला. यावेळी पती हरिशने पत्नी उत्पलाचा गळा आवळून हत्या केली. मृतदेहाची विल्हेवाट लावण्यासाठी तिचा मृतदेह एका गोणीत टाकून विरार पूर्वेच्या मोहक सिटी परिसरात असलेल्या रेल्वे रूळाजवळ नेला. रात्री तीन वाजताच्या सुमारास त्याने तिचा कोयत्याने गळा चिरून शिर आणि धड वेगळे केले. त्यानंतर धड नाल्यात टाकले आणि शीर एका बॅगेत भरून ती बॅग मुंबई – अहमदाबाद राष्ट्रीय महामार्गावर विरार परिसरातील शिरवली नजीकच्या पिरकुंडा दर्ग्याजवळील झाडाझुडपात निर्जन जागेत फेकून दिली.आरोपी हरिशने पत्नीची हत्या करून मृतदेहाची विल्हेवाट लावली होती. प्रवासी बॅगेत तिचे शिर त्याने टाकले होते, मात्र अन्य वस्तू काढायला तो विसरला होता. पोलिसांना तपासादरम्यान घटनास्थळावरून एक छोटी सराफाची पिशवी आढळून आली. या पिशवीवरून पश्चिम बंगालच्या २४ परगणा जिल्ह्यातील सराफ मालकाला संपर्क केला. तिथून सोने खरेदी करून मुंबईला गेलेल्या ग्राहकांची यादी पोलिसांनी मागवली. यात आठ नागरिकांची नावे आणि मोबाईल नंबर पोलिसांना मिळाले. पोलिसांनी या आठ नागरिकांना संपर्क साधला असता उत्पला हप्परगी महिलेचा मोबाईल बंद असल्याचे समोरपोलिसांना या महिलेबाबत ती नालासोपारा येथील रेहमतनगर परिसरात पतीसोबत राहत होती अशी माहिती समोर आली. त्यानंतर पोलिसांना महिलेला गोणीतून घेऊन जात असलेल्या दुचाकीचा शोध लागला. पोलिसांनी महिलेच्या पतीच्या दुचाकीवरून तिच्या पतीचा शोध घेतला. नालासोपारा रेहमतनगर परिसरातील इमारतीत महिलेच्या पतीची दुचाकी पार्क केल्याचे आढळून आले. पोलिसांनी या इमारतीच्या सदनिकेतून हरीश हप्परगी याला ताब्यात घेऊन त्याची चौकशी केली असता त्याने पत्नीची हत्या केल्याची काबुली दिली. आरोपीने नाल्यात फेकून दिलेले महिलेचे धड अद्याप सापडलेले नसून त्याचा शोध पोलिसांमार्फत सुरू आहे. आरोपी पती हरीश हप्परगी याला पोलिसांनी अटक केली असून अधिक तपास पोलीस करत आहेत.