विवाहितेचा संशयितरित्या खून, सासरच्यांनी शव शौचालयाच्या टाकीत लपवला; ३ दिवसांनंतर एका कॉलने गुढ उकललं.

 बिहारमधून थरकाप उडवणारी घटना समोर आली आहे. विवाहित महिलेची तिच्या सासरच्यांनी निर्घृणपणे हत्या केली आहे. धक्कादायक म्हणजे तिचा मृतदेह शौचालयाच्या टाकीत आढळून आला आहे.बिहारमधून थरकाप उडवणारी घटना समोर आली आहे. विवाहित महिलेची तिच्या सासरच्यांनी निर्घृणपणे हत्या केली आहे. धक्कादायक म्हणजे तिचा मृतदेह शौचालयाच्या टाकीत आढळून आला आहे. पोलिसांनी मृतदेह ताब्यात घेतला असून महिलेच्या पतीला आणि सासूला बेड्या ठोकल्या आहेत. या घटनेनंतर परिसरात एकच खळबळ उडाली आहे. वृत्तानुसार, बिहारच्या असरगंज पोलीस ठाणे हद्दीतील साजुवा गावातील कुशवाह टोला येथे ही घटना घडली आहे. मृत महिलेचे नाव अनिशा भारती असे आहे. सजुआ येथे राहणाऱ्या आशिष कुमार याच्याशी दोन वर्षांपूर्वी तिचा प्रेमविवाह झाला होता. अनिशा, तिचे पती आणि सासरच्या लोकांमध्ये बऱ्याच काळापासून वाद सुरू असल्याचे सांगण्यात येते.अनिशा माहेरी गेली होती. ६ मार्चला ती सासरी परतली. पण त्यानंतर अनिशाच्या पालकांना तिची कोणतीही खबर समजली नाही.

त्यांना चिंता वाटू लागली यासाठी तिच्या माहेरच्यांनी तिचे सासर असलेले साजुवा गाव गाठले. पण तिथे त्यांना अनिशाबद्दल काहीच माहिती समजली नाही. आपल्या मुलीची कोणतीच खबर नसल्याने तिचे आई वडिल चिंतेत बुडाले. त्यांनी असरगंज पोलिस ठाण्यात तक्रार दाखल केली. तक्रारीची दखल घेत पोलिसांनी अनिशाच्या पतीला ताब्यात घेऊन त्याची चौकशी केली. परंतु आशिषने पत्नीच्या सासरी परतण्याच्या गोष्टीला नकार दिला आणि अनिशा कोणासोबत तरी पळून गेली आहे, असे आशिषने पोलिसांना सांगितले.यानंतर तिचे पालक निराश होऊन घरी परतले. त्यानंतर ९ मार्चच्या रात्री एका शेजाऱ्याने अनिशाच्या पालकांना फोन करून सांगितले की, आशिषने अनिशाची हत्या करून तिचा मृतदेह शौचालयाच्या टाकीत फेकून दिला आहे. ही माहिती मिळताच मृताच्या कुटुंबीयांनी तात्काळ पोलिस ठाणे गाठले. पोलिसांना घटनेची माहिती दिली.

पोलिसांनी तातडीने कारवाई करत आशिषच्या घरावर छापा टाकला आणि शौचालयाच्या टाकीतून मृतदेह ताब्यात घेतला. पोलिसांनी मृतदेह शवविच्छेदनासाठी मुंगेरला पाठवला आहे. याप्रकरणी पोलिसांनी आरोपी पती आशिष कुमार आणि त्याच्या आईला अटक केली आहे. मुंगेरचे एसपी सय्यद इम्रान मसूद म्हणाले की, पोलिसांनी तातडीने कारवाई करत मृतदेह ताब्यात घेतला आहे आणि पुढील तपास सुरू आहे.