हातपाय बांधून दांडक्याने मारहाण, नाशिक मध्यवर्ती कारागृहात बंदिवानाचा छळ; नऊ संशयितांवर गुन्हा.

पुढील दोन-तीन दिवस सागरच्या हातापायाची बेडी न काढता संशयितांनी त्याला शिवीगाळ करून ‘हा प्रकार बाहेर सांगितल्यास, तुला सोडणार नाही’, अशी धमकी दिली.खुनाच्या गुन्ह्यातील संशयित कैद्याचे हातपाय बांधून त्याला बेड्या ठोकत लघुशंका व शौचाला जाण्यापासून रोखण्यात आले. त्याचबरोबर त्यास लाकडी दांडक्याने व बॅटने इतर कैद्यांनी जबर मारहाण केल्याचा धक्कादायक प्रकार नाशिकरोड मध्यवर्ती कारागृहात घडला. त्यामुळे पीडित कैद्याने आत्महत्येचाही प्रयत्न केला असून, मालेगाव न्यायालयात त्याने ही आपबिती कथन केल्यावर प्रकरणाचा उलगडा झाला.याप्रकरणी नऊ संशयितांविरुद्ध गुन्हा नोंद असून, कारागृह अधीक्षक व डॉक्टरांनीही निष्काळजी दर्शविल्याची गंभीर नोंद फिर्यादीत आहे. नाशिकरोड पोलिसांनी दिलेल्या माहितीनुसार, सागर उर्फ पंकज बाजीराव चौधरी (वय २५, रा. नेर कुसुंबा, धुळे) असे पीडित कैद्याचे नाव आहे. आठ दिवसांपूर्वी संशयित पॉल व त्याचे साथीदार वाघमारे (वॉचमन), दिनेश चव्हाण (वॉचमन), लाला, मामा (बंदी असलेला कैदी), वाजीद, महाजन, अमोल, मोहन (कैदी, सर्व रा. नाशिकरोड मध्यवर्ती कारागृह) यांच्याविरुद्ध गुन्हा नोंद आहे. दरम्यान, सदर अत्याचाराची माहिती चौधरीने मालेगाव न्यायालयात कथन केल्यानंतर मालेगाव छावणी पोलिसांनी गुन्हा नोंदवून नाशिकरोड पोलिस ठाण्यात वर्ग केला.

चौधरी हा सन २०२१ मध्ये जायखेडा येथे घडलेल्या एका खुनात संशयित असून, १४ ऑक्टोबर २०२१ पासून तो न्यायालयाच्या आदेशान्वये कारागृहात आहे.सागरला लघुशंकेला जायचे असताना संशयितांनी त्याला बांधून ठेवत समोर एक बादली ठेवली. त्याने बादलीत लघुशंका करण्यास विरोध केला. त्याच्या हातापायाची बेडी काढून चहुबाजूने त्याच्याभोवती उभे राहून संशयितांनी मारहाण केली. पॉल व वाघमारे यांनी सागरच्या गळ्याला रुमाल गुंडाळून ओढला, तर वाजीदने पायावर लाकडी दांडक्याने मारहाण केली. कारागृहातील डॉक्टरकडे काम करणाऱ्या कैदी महाजन याने बेल्टने मारहाण केली. वेदना असह्य होत असल्याने आरडाओरड केल्यावर वाघमारेने सागरचे डोके भिंतीवर आपटले. सागरच्या डोक्यातून रक्तस्राव सुरू झाल्यावर संशयितांनी त्याला सोडून दिले. त्यानंतर सागरने डॉ. माळी यांच्याकडे तक्रार केली परंतु, त्याचा काहीच उपयोग झाला नाही.सागर तुरुंगात असल्याने त्याचे वडील दरमहा ‘मनीऑर्डर’ पाठवित होते. त्यापैकी मागील तीन महिन्यांची साडेसात हजार रुपयांची ‘मनीऑर्डर’ त्याच्या नावे इतरांनी स्वाक्षरी करून लुटल्याचे फिर्यादीत आहे. या सर्व जाचाला कंटाळून त्याने आत्महत्या करण्याचाही प्रयत्न केला. हे सर्व प्रकार कारागृहातील सीसीटीव्हीत चित्रीत झाल्याचा दावा सागरने फिर्यादीत केला आहे.

त्यामुळे कारागृह प्रशासनाच्या कार्यपद्धतीवरही प्रश्नचिन्ह उपस्थित झाले आहे. सागरच्या नावे नेमक्या कोणी स्वाक्षरी केल्या, याचा तपास सुरु आहे.२५ फेब्रुवारी ते ४ मार्च २०२५ या कालावधीत सर्कल क्रमांक चारमध्ये कैद्यांचे एकमेकांशी वाद झाले. त्यातून संशयितांनी चौधरीवर संशय घेत त्याला कारागृहातील दवाखान्याच्या स्वच्छतागृहाजवळ नेत दोन्ही हातापायांना बेड्या ठोकल्या. त्यावेळी कारागृहात भेळभत्ता व जेवण वाटणारा पॉल स्वच्छतागृहातून बाहेर आला. त्याने अस्वच्छ हातानेच बळजबरीने सागरला भत्ता खाण्यास दिला. सागरने नकार देताच त्याला शिवीगाळ करून मारहाण करण्यात आली. पुढील दोन-तीन दिवस सागरच्या हातापायाची बेडी न काढता संशयितांनी त्याला शिवीगाळ करून ‘हा प्रकार बाहेर सांगितल्यास, तुला सोडणार नाही’, अशी धमकी दिली.गंभीर बाब म्हणजे, कारागृह अधीक्षक राउंडवर असताना सागरने संशयितांबाबत तक्रार केली होती. त्यामुळे संशयितांनी खुन्नस ठेऊन सागरला स्वच्छतागृहात जाण्यापासून कित्येक तास ताटकळत ठेवले. दुर्दैवाने त्यास स्वच्छतागृहाबाहेरच शौचास बसावे लागले. परंतु, तरीही अधीक्षकांनी दखल न घेतल्याचे फिर्यादीत नमूद आहे.