महिलेवर आधी लाकडाने वार, नंतर गळ्यात स्क्रू-ड्रायव्हर भोसकला; महिला दिनाच्या पूर्वसंध्येला भयंकर घडलं.

महिला दिनाच्या पूर्वसंध्येला एका महिलेसोबत मन हेलावून टाकणारी घटना घडली आहे. महिलेला निर्दयी वागणूक दिल्याची घटना म्हसळा तालुक्यातून समोर आली आहे.जगभर ८ मार्च हा आंतरराष्ट्रीय महिला दिन म्हणून साजरा होतो. कर्तृत्ववान स्त्रियांचा, माता-भगिनी, पत्नीचा सन्मान करणारा हा दिवस आहे. मात्र महिला दिनाच्या पूर्वसंध्येला एका महिलेसोबत मन हेलावून टाकणारी घटना घडली आहे. महिलेला निर्दयी वागणूक दिल्याची घटना म्हसळा तालुक्यातून समोर आली आहे. तिच्या डोक्यात लाकडाने वार करण्यात आला, उशीने तिचे तोंड दाबून तिला जीवानिशी मारण्याचा प्रयत्न झाला. यातही जीव जात नव्हता म्हणून त्याने तिच्या गळ्यात स्क्रू-ड्रायव्हर देखील खुपसला आहे. या घटनेमुळे रायगड हादरले आहे.

रायगडच्या म्हसळा तालुक्यतील कुडतुडीवाडीतून ही मन हेलावून टाकणारी घटना घडली आहे. पीडित महिला घरी कपडे धूत असताना तिचा पहिला नवरा व त्याचा मित्र अचानक दरवाजा ढकलून घरात घुसले. त्यांनी तिच्यावर थेट हल्ला चढवला. दोघांनी महिलेच्या डोक्यात धोपटने घालून तिला खाली पाडले.एवढ्यावरच न थांबता नवऱ्याच्या मित्राने तिचे तोंड उशीने दाबून ठेवले आणि ‘हिचा काटा बऱ्याच दिवसांपासून काढायचा होता, आता चान्स मिळाला आहे, हिला जिवंत सोडायचे नाही’ असे म्हणत तिच्या गळ्यावर स्क्रू-ड्रायव्हर दोन ते तीन वेळा खुपसला. यामध्ये महिला गंभीररित्या जखमी झाली आहे.पीडित महिलेने याप्रकरणी म्हसळा पोलीस ठाण्यात तक्रार दाखल केली. तक्रारीची दखल घेत पोलिसांनी आरोपी दुर्वेश धाडवे (रा.नळेफोडी-माणगाव) आणि त्याच्या अज्ञात मित्राविरोधात गुन्हा दाखल केला आहे. पीडित महिला गंभीर जखमी झाली आहे. तर तिला म्हसळा येथून उपजिल्हा रुग्णालय माणगाव येथे उपचारासाठी दाखल करण्यात आले आहे. ती जीवन-मरणाची लढाई लढत आहे.