२८ दिवसांपासून अल्पवयीन मुलगी बेपत्ता, पुणे पोलिसांकडून तपासात चालढकल, कुटुंबाचा गंभीर आरोप.

एक मुलगी आपल्या घरातून बेपत्ता झाली असून २८ दिवसांनंतरही पोलिस तिचा शोध लावण्यात अपयशी ठरले आहेत. यावरुन मुलीच्या कुटुंबीयांनी पोलिसावर हलगर्जीपणाचा आरोप लावला आहे.स्वारगेट बस स्थानकात तरुणीवर लैंगिक अत्याचार झाल्याची घटना ताजी असतानाच, आता पर्वती पोलीस ठाण्याच्या हद्दीत एक धक्कादायक घटना समोर आली आहे. अवघ्या १४ वर्षांची अल्पवयीन मुलगी गेल्या २८ दिवसांपासून बेपत्ता असून, तिचा अद्यापही शोध लागलेला नाही. मुलीच्या अचानक गायब झाल्यामुळे तिचं कुटुंब चिंतेत आहे. प्राथमिक माहितीनुसार, एका तरुणाने फूस लावून तिला पळवून नेले आहे. मात्र, पोलिसांकडून तपास करण्यात चालढकल होत असल्याचा आरोप मुलीच्या कुटुंबीयांनी केला आहे. त्यामुळे पुण्यात महिलांच्या सुरेक्षेचा प्रश्न पुन्हा एकदा ऐरणीवर आला आहे.

कोमल भोसले (वय ३१) या मुलीच्या आईने पर्वती पोलीस ठाण्यात ७ फेब्रुवारी २०२५ रोजी तक्रार दाखल केली होती. तक्रार दाखल झाल्यानंतर पोलिसांनी गुन्हा नोंदवला असला, तरी शोधमोहीम संथ गतीने सुरू असल्याचे कुटुंबीयांचे म्हणणे आहे.७ फेब्रुवारी रोजी कोमल भोसले आपल्या कामावर गेल्या असताना त्यांच्या नवऱ्यासोबत त्यांचे तीनही मुलं घरी होते. त्यानंतर काही वेळाने त्यांच्या मुलाचा फोन आला आणि त्याने सांगितले की बहीण घरातून निघून गेली असून अद्याप परत आलेली नाही. त्यामुळे घाबरलेल्या आईने तत्काळ पोलीस ठाण्यात जाऊन तक्रार नोंदवली.प्राथमिक तपासात एका अज्ञात तरुणाने मुलीला फूस लावून पळवून नेल्याची शक्यता वर्तवण्यात आली आहे. मात्र, २८ दिवस उलटूनही पोलीस तिचा ठावठिकाणा लावण्यात अपयशी ठरले आहेत.नुकतीच स्वारगेट पोलीस ठाण्याच्या हद्दीत एका तरुणीवर बलात्काराची घटना घडल्यामुळे नागरिकांमध्ये भीतीचे वातावरण आहे. कुटुंबीयांना आपल्या मुलीबाबतही अशीच भीती वाटत आहे. अल्पवयीन मुलगी शाळेच्या नवव्या इयत्तेत शिकत असल्याने तिचे शैक्षणिक नुकसानही होत आहे. पोलीस प्रशासनाने तातडीने शोधमोहीम राबवून मुलीला परत आणावे, अशी कुटुंबीयांची मागणी आहे.