रुळांजवळ पडलेली बॉडी तपासायला गेले, कल्याणमध्ये रेल्वे पोलीस अधिकाऱ्यालाच लोकलची धडक.

अचानक दोन्ही बाजूंनी आलेल्या लोकलचा अंदाज न आल्याने गरजे यांना लोकलची धडक लागली. रेल्वे ट्रॅकच्या लगत सापडलेल्या तरुणीच्या मृतदेहाचा पंचनामा करताना लोकल ट्रेनची धडक बसल्यामुळे रेल्वेचे सहाय्यक पोलीस निरीक्षक गंभीर जखमी झाले आहेत. त्यांना उपचारासाठी रुग्णालयात दाखल करण्यात आले आहे.मध्य रेल्वेच्या तानशेत खर्डी स्टेशन दरम्यान रात्री बारा वाजताच्या सुमारास एका तरुणीचा मृतदेह आढळल्याची माहिती कल्याण रेल्वे पोलिसांना मिळाली. या मृतदेहाचा पंचनामा करण्यासाठी कल्याण रेल्वेचे सहाय्यक पोलीस निरीक्षक कैलास गरजे घटनास्थळी पोहोचले. पंचनामा करत असताना अचानक दोन्ही बाजूंनी आलेल्या लोकलचा अंदाज न आल्याने गरजे यांना लोकलची धडक लागल्याने ते गंभीर जखमी झाल्याची घटना शुक्रवारी पहाटे पाच वाजण्याच्या सुमारास घडली. जखमी गरजे यांना उपचारासाठी रुग्णालयात दाखल करण्यात आल्याची माहिती कल्याण रेल्वेचे वरिष्ठ पोलीस निरीक्षक पंढरीनाथ कांदे यांनी दिली.

आसनगाव रेल्वे स्थानकाजवळ दोन दिवसापूर्वी आकांक्षा जगताप या तरुणीचा मृतदेह सापडला होता. त्यातच काल रात्री उशिरा तानशेत खर्डी दरम्यान रेल्वे ट्रॅक लगत एक तरुणी रक्ताच्या थारोळ्यात पडल्याची माहिती रेल्वे मोटरमनकडून रेल्वे पोलिसांना देण्यात आली.
कल्याण रेल्वे पोलिसांनी घटनेचे गांभीर्य लक्षात घेऊन तातडीने घटनास्थळाकडे कूच केली. सहाय्यक पोलीस निरीक्षक कैलास गर्जे पहाटेच्या अंधारात घटनास्थळी पंचनामा करत असताना अचानक दोन्ही बाजूंनी एकाच वेळी लोकल आल्या. यामुळे लोकलची धडक लागून गर्जे जखमी झाले असून त्यांना उपचारासाठी रुग्णालयात दाखल करण्यात आले आहे.दुसरीकडे, डोंबिवलीत लोकल ट्रेनमध्ये एका १९ वर्षीय तरुणाने तीन जणांवर चाकूने हल्ला केल्याची घटना काल समोर आली होती. तिन्ही जखमींना रुग्णालयात दाखल करण्यात आले, तेथून त्यांना प्राथमिक उपचारानंतर घरी सोडण्यात आले. या प्रकरणात डोंबिवली रेल्वे पोलिसांनी आरोपीला अटक केली आहे.काल सकाळी १० वाजता शेख झिया हुसेन कल्याण रेल्वे स्थानकावरून दादरला जाणाऱ्या जलद लोकल ट्रेनमध्ये चढला. त्याला मुंब्रा येथे उतरायचे होते, पण प्रवाशांनी त्याला सांगितले की जलद लोकल मुंब्रा येथे थांबणार नाही. यानंतर जियाने डोंबिवली रेल्वे स्थानकावर उतरण्याचा प्रयत्न केला, परंतु तो उतरु शकला नाही. याचा राग येऊन त्याने प्रवाशांवर चाकूने हल्ला केला.