Rajendra Nikam
आईस्क्रीममध्ये सापडलेले बोट कोणाचे? DNA अहवालातून स्पष्ट, पोलिसांच्या तपासाला यश (फोटो सौजन्य-ट्विटर)
मुंबईतील मालाड परिसरात आइस्क्रीममध्ये सापडलेल्या बोटाच्या डीएनए चाचणीचा अहवाल समोर आला आहे.
या अहवालात हे बोट इंदापूर येथील एका कारखान्यातील कामगाराची असल्याचे सिद्ध झाले आहे. ओमकार पोटे असे या कर्मचाऱ्याचे नाव आहे. फॅक्टरीतील आईस्क्रीम पॅक करण्याचे काम करत असताना ओमकारच्या बोटाला अपघात झाला. यानंतर ओमकारचे मधले बोट तुटून आईस्क्रीमच्या कोनमध्ये पडले.
मिळालेल्या माहितीनुसार, 11 मे 2024 रोजी ओंकार पोटे यांच्या उजव्या हाताचे मधले बोट आईस्क्रीम पॅक करताना कापले गेले होते. आईस्क्रीम कोनवर बनवण्याची तारीख देखील त्याच दिवसापासून होती. या खुलाशानंतर मुंबई पोलिसांनी फॉर्च्युन कंपनीविरुद्ध निष्काळजीपणाचा गुन्हा दाखल केला.
13 जून रोजी मालाड येथील रहिवासी असलेल्या 26 वर्षीय डॉ. ओर्लेम ब्रँडन सेराव यांनी ऑर्डर केलेलं बटरस्कॉच आईस्क्रीम त्यांच्या बहिणीने अर्धे भाग खाल्ले, त्यावेळीस त्यांना वेगळी चव जाणवली. त्यानंतर आईस्क्रीमचा कोन नीट पाहिल्यानंतर त्यामध्ये मानवी बोट असल्याचे स्पष्ट झाले.
त्यांनी आईस्क्रीम कंपनीच्या इन्स्टाग्राम पेजवर तक्रार नोंदवली, मात्र कंपनीकडून कोणताही प्रतिसाद न आल्याने सेराव यांनी पोलिसांना घटनेची माहिती दिली. पोलिसांनी त्यांच्या प्राथमिक तपासात सांगितले की, आइस्क्रीममध्ये मानवी बोट होते आणि ते फॉरेन्सिक तपासणीसाठी पाठवले होते.
तपासादरम्यान पोलिसांना हे बोट पुणे जिल्ह्यातील इंदापूर येथील एका फॅक्टरीतील कर्मचाऱ्याचे असल्याचे निष्पन्न झाले होते. त्यानंतर हे बोट याच कर्मचाऱ्याचे आहे का? हे तपासण्यासाठी डिएनए चाचणी करण्यात आली होती. या चाचणीचा अहवाल सादर करण्यात आला असून, हे बोट पोटे या कर्मचाऱ्याचेच असल्याचे स्पष्ट झाले आहे.
