काडीपेटीतून ‘एमडी’ तस्करी? दोन्ही टोळ्यांचे मुंबई ‘कनेक्शन’; शहरातले अनेकजण गुरफटले

 ‘एनडीपीएस’ने शनिवारी (दि. ११) मुंबई नाका परिसरात सापळा रचून एका पुरुषासह तीन महिलांना अटक केली. त्यांच्याकडून ७५.५ ग्रॅम ‘एमडी’ जप्त केले. नाशिक अमली पदार्थ विरोधी पथकाने (एनडीपीएस) मॅफेड्रॉन (एमडी) तस्करी करणाऱ्या दोन सराईत गुन्हेगारांना अटक केल्यानंतर त्यांचेही मुंबई ‘कनेक्शन’ समोर आले आहे. तर, सहा दिवसांपूर्वी अटक केलेल्या एका पुरुषासह तीन महिलांनीदेखील मुंबईतूनच ‘एमडी’ खरेदी केल्याचे तपासात उघड झाले. विशेष म्हणजे, दोन सराईत गुन्हेगारांनी काडीपेटीत ‘एमडी’ लपवून तस्करी केल्याचे समोर येत आहे. त्यामुळे अजूनही मुंबईतून नाशिकमध्ये ‘एमडी’ तस्करी सुरू असून, शहरातले अनेकजण ‘नशेच्या बाजारात’ गुरफटल्याचा संशय व्यक्त होत आहे. सन २०२२ मध्ये एका तरुणाच्या मृत्यूस जबाबदार ठरल्याप्रकरणी नाशिकरोड मध्यवर्ती कारागृहात असताना इतर बंदिवानांशी ओळख करुन मॅफेड्रॉन (एमडी) तस्करीची माहिती मिळत ‘नशेच्या बाजारात’ पाऊल टाकलेल्या दोघांना ‘एनडीपीएस’ने अटक केली आहे. रोहित नंदकुमार पवार (वय २८, रा. चेतनानगर) व बाबू प्यारेलाल कनोजिया (३५, रा. हेगडेवार नगर) अशी संशयितांची नावे आहेत.

त्यांच्याकडून साडेतीन लाखांचे ‘एमडी’ जप्त केले असून, कारागृहात तस्करीची माहिती घेत बाहेर येताच दोघांनीही ‘एमडी’ विक्री सुरू केल्याचे समोर येत आहे. दरम्यान, ‘एनडीपीएस’ने शनिवारी (दि. ११) मुंबई नाका परिसरात सापळा रचून एका पुरुषासह तीन महिलांना अटक केली. त्यांच्याकडून ७५.५ ग्रॅम ‘एमडी’ जप्त केले.गणेश कैलास गिते (वय ४५, रा. मखमलाबाद), ऋतुजा भास्कर झिंगाडे (२२, रा. शिवाजी पार्क, सातपूर), स्वीटी सचिन अहिरे (२८, रा. श्रीधर कॉलनी, पेठरोड), पल्लवी निकुंभ उर्फ सोनाली शिंदे (३६, रा. साईनगर, अमृतधाम) अशी संशयितांची नावे आहेत. या दोन्ही टोळ्यांनी मुंबईतून ‘एमडी’ खरेदी केली असून, काही महिन्यांपासून ते शहरात विक्री करीत होते. ‘छोटी भाभी’ प्रकरणावेळीही ‘मुंबई कनेक्शन’ उघड झाले होते. तर, त्यानंतरही शहरात झालेल्या ‘एमडी’च्या गुन्ह्यांत नशेचा बाजार मुंबईमार्गे होत असल्याचे निष्पन्न झाले. त्यामुळे ‘एनडीपीएस’ने आता मुंबईतल्या ‘एमडी’ तस्करांना ताब्यात घेण्यावर लक्ष केंद्रीत केले आहे

शयित सनी पगारे व अर्जुन पिवाल यांच्या टोळीला सन २०२३ मध्ये नाशिक ‘एनडीपीएस’ने अटक केली होती. सोलापुरात सनी पगारेचा एमडीचा कारखाना व गोदाम उद्ध्वस्त करण्यात आले होते. त्यामध्ये हैदराबादपासून तर आंतरराष्ट्रीय तस्करीपर्यंतचे धागेदोरे पोलिसांच्या हाती लागले होते. विशेष म्हणजे, सनी पगारेची टोळी सोलापुरात एमडी तयार करुन ‘साउंड बॉक्स’मधून नाशिकमध्ये व राज्यासह देशात इतरत्र पाठवित असल्याचे उघड झाले होते. त्यानंतर सामनगाव परिसरात एका तरुणाला पोलिसांनी थेट वजनकाट्यासह अटक केली होती. त्यामुळे ‘एमडी’ तस्करीत ‘साउंड बॉक्स’ पाठोपाठ काडीपेटीचाही वापर झाल्याचे पुढे येत आहे. दरम्यान, नशेच्या या गुन्ह्यांतील संशयितही ‘ड्रग्ज’च्या आहारी गेले असल्याने त्यांच्या हातावर गंभीर स्वरुपाच्या जखमा आहेत. याप्रकरणी वरिष्ठ निरीक्षक सुशिला कोल्हे यांच्या सूचनेनुसार ‘एनडीपीएस’चे अधिकारी-कर्मचारी पुढील तपास करीत आहेत.