जळगावात वीजचोरी करणाऱ्यांवर महावितरणची कारवाई; 175 मीटर जप्त

जळगाव लाईव्ह न्यूज । जळगाव शहर आणि त्याच्या परिसरात वीजचोरी रोखण्यासाठी महावितरणने व्यापक मोहीम हाती घेतली असून या मोहिमेत महावितरणचे ३८ पथके सहभागी झाली आणि वीजचोरी करणाऱ्या १८५ प्रकरणांवर कठोर कारवाई केली. या कारवाईत १७५ वीज मीटरमध्ये फेरफार केल्याचे आढळून आले, ज्यामुळे ते जप्त करण्यात आले.महावितरणचे कार्यकारी संचालक धनंजय आँढेकर यांच्या मार्गदर्शनाखाली जळगाव विभागात २८ कक्षांमध्ये विशेष मोहीम राबवली गेली. नशिराबाद, असोदा, म्हसावद आणि जळगाव शहरातील विविध ठिकाणी वीजचोरीचे प्रकार उघडकीस आले. महावितरणच्या पथकांनी निरीक्षणात आणलेल्या मीटरमध्ये आकडे टाकून वीजचोरी होत असल्याचे निदर्शनास आणले.

महावितरणच्या जळगाव विभागाचे प्रभारी कार्यकारी अभियंता गोपाळ महाजन यांनी सांगितले, “अनधिकृत वीजवापर रोखण्यासाठी अधिकृत वीज जोडणी आवश्यक आहे. नागरिकांनी लवकरात लवकर वीज चोरी थांबवून अधिकृत जोडणीसाठी पुढाकार घ्यावा. वीज चोरीमुळे केवळ आर्थिक तोटा नाही तर तांत्रिक यंत्रणेलाही हानी पोहोचते.” जप्त केलेल्या १७५ संशयास्पद वीज मीटरची तपासणी सुरू आहे.महावितरणने ग्राहकांना वीज चोरी टाळण्यासाठी प्रोत्साहित करत योग्य मार्गदर्शन केले आहे. या मोहिमेत महावितरणच्या ३८ पथकांनी एकत्रित काम करत वीजचोरी रोखण्यासाठी कठोर पावले उचलली. या कारवाईमुळे जळगाव शहर आणि ग्रामीण भागातील वीजचोरीला आळा बसला असून, भविष्यात अशा प्रकारांवर अधिक कठोर कारवाई केली जाणार असल्याचे महावितरणच्या अधिकाऱ्यांनी स्पष्ट केले. महावितरणच्या या कठोर पावलांमुळे वीजचोरी करणाऱ्यांना धडा मिळाला असून, वीज चोरीच्या प्रकरणांमध्ये मोठी घट होण्याची शक्यता वर्तवली जात आहे.