भरधाव डिझायर गाडीने बैलगाडीला जोरदार धडक – शेतकरी व बैल गंभीर जखमी.

भडगाव-कजगाव रस्त्यावर रविवारी दुपारी एक गंभीर अपघात घडला. भडगावकडून भरधाव वेगाने येणाऱ्या डिझायर गाडी (क्रमांक MH 02 BR 1601) ने बैलगाडीला जबर धडक दिली. या अपघातात कोठली येथील शेतकरी विजय पाटील गंभीर जखमी झाले असून दोन्ही बैलांच्याही पायांना गंभीर इजा झाली आहे.

मिळालेल्या माहितीनुसार, आज दुपारी तीन ते साडेतीन वाजेच्या सुमारास जळगाव-चांदवड महामार्गावरील कोठली फाट्याजवळ शेतीचे काम आटोपून घरी परतणाऱ्या बैलगाडीला भरधाव डिझायर कारने जबरदस्त धडक दिली. धडकेची तीव्रता इतकी होती की बैलगाडी अक्षरशः चकनाचूर झाली. घटनास्थळी उपस्थित नागरिकांनी तात्काळ धाव घेत जखमी शेतकऱ्याला रुग्णालयात उपचारासाठी रवाना केले, तर बैलांना जागेवर प्राथमिक उपचार करण्यात आले. शेतकरी विजय पाटील यांची प्रकृती चिंताजनक असल्याचे सांगण्यात येत असून अपघाताची माहिती मिळताच भडगाव पोलीस ठाण्याचे उपनिरीक्षक तात्काळ घटनास्थळी दाखल झाले आणि पुढील तपास व कारवाई सुरू केली आहे. भरधाव वेगाने वाहन चालवणाऱ्या चालकाविरुद्ध कायदेशीर कारवाई होण्याची शक्यता आहे. या घटनेमुळे परिसरात एकच खळबळ उडाली असून, वाहनचालकांच्या बेफिकीरपणामुळे शेतकऱ्यांचे व बैलांचे प्राण संकटात येत असल्याचे नागरिकांतून तीव्र नाराजी व्यक्त केली जात आहे.